АҚШ-та украиналық босқынның құрметіне "Ирина заңы" қабылданды
АҚШ-тың Солтүстік Каролина штатының губернаторы Джош Стайн «Ирина заңы» деп аталған құжатқа қол қойды. Бұл заң Ресейдің соғысы салдарынан босып келген 23 жастағы украиналық босқын Ирина Заруцкаяның құрметіне аталған. Ол аталған штатта қоғамдық көлікте пышақталып, қаза тапқан еді, деп хабарлайды Malim.kz.
Fox News хабарлауынша, жаңа заң кейбір зорлық-зомбылық қылмыстары мен қайталанған құқықбұзушылықтар үшін қолма-қол кепілдікті пайдалануға тыйым салады, сондай-ақ магистраттар мен судьялардың өкілеттіктерін шектейді, штаттың бас судьясына магистраттарды уақытша қызметінен шеттетуге мүмкіндік береді және сотталушылардың көбірек психикалық денсаулығын тексеруден өтуін міндеттейді.
Демократиялық партия өкілі Джош Стайн құжаттың барлық тармақтарымен келіспейтінін, алайда оны қол қойғанын атап өтті.
«Бұл заң сот органдарын зорлық-зомбылық қаупі жоғары адамдарға ерекше назар аударуға міндеттейді. Бұл – дұрыс шешім», — деді ол.
Сонымен қатар губернатор өзі қызметте отырған кезде Солтүстік Каролинада өлім жазасына жол берілмейтінін айтты.
Ирина Заруцкая 23 тамыз күні Солтүстік Каролинадағы Шарлотт қаласында пойыз вагонында пышақталып өлтірілген. Қылмысқа 34 жастағы үйсіз адам Декарлос Браун айыпталып отыр.
10 қыркүйекте АҚШ президенті Дональд Трамп бұл істі дереу қарауға шақырып, өлім жазасын «жалғыз дұрыс үкім» деп атады.
«Басқа нұсқа болмауы керек!!!» — деп жазды ол Truth Social желісінде.
Шарлотт мэрі Виола Лайлс бұл оқиғаны «сот жүйесінің ауыр сәтсіздігі» деп атап, қоғамдық көліктегі полиция қызметін күшейтуге уәде берді.
Айыпталушының бұған дейін бірнеше рет сотталғаны және психикалық дертке шалдыққан болуы мүмкіндігі хабарланды.
Губернатор Стайн Ирина Заруцкаяның өліміне қатысты кадрларды көріп, «терең күйзелгенін» мәлімдеді. Ал Мекленберг округінің прокуроры Спенсер Мерривезер Axios басылымына берген сұхбатында кейбір айыпталушылар психиатриялық емдеу орындарында жылдар бойы сотқа қабілетті деп танылуын күтіп жататынын айтты.
Фото: Peter Zay/Anadolu/picture alliance
