АҚШ Украинаға Patriot зымырандарын беретін болды

The New York Times Конгресстегі дереккөзге сілтеме жасай отырып, АҚШ Германияға Украинаға артиллериялық зымырандар мен Patriot әуе қорғаныс зымырандарын беруге рұқсат еткенін хабарлады.

АҚШ Германияға Украинаға 125 алыс қашықтықтағы артиллериялық зымыран мен 100 Patriot әуе қорғаныс зымыранын беруге рұқсат етті деп жазады The New York Times (NYT) сенбі, 10 мамыр күні АҚШ Конгресіндегі дереккөзге сілтеме жасап.
Басылымның түсіндіруінше, бұл оқ-дәрілер АҚШ-та өндірілгендіктен, олар басқа елге тиесілі болса да, оларды экспорттауға АҚШ үкіметінің рұқсатынсыз болмайды.

АҚШ Мемлекеттік департаменті Трамп тұсында алғаш рет Киевке қару сатуға рұқсат берді
29 сәуірде АҚШ Конгресінің жоғарғы палатасының сайтында жарияланған құжатта АҚШ Мемлекеттік департаменті Киевке «қорғаныс өнімдерін, оның ішінде техникалық деректерді», сондай-ақ «қорғаныс қызметтерін» 50 миллион доллар немесе одан да көп сомаға жеткізуге рұқсат бергені айтылған.

Бұл жөнінде 1 мамыр күні украиналық Kyiv Post басылымы да дипломатиялық дереккөздерге сілтеме жасап хабарлады. Журналистер бұл рұқсат Дональд Трамп Ақ үйге қайта оралғаннан бергі алғашқы осындай шешім екенін атап өтті.

Германия үкіметі Киевке жеткізілетін қару туралы ақпаратты азайтпақ
9 мамыр, жұма күні Reuters агенттігі дереккөзге сілтеме жасап, Германияның жаңа үкіметі Украинаға қару-жарақ жүйелерін жеткізу жөніндегі жарияланатын ақпарат көлемін азайтпақ ниетте екенін хабарлады.
Агенттіктің сұхбаттасушысы мұндай қадамның мақсаты – соғыс кезінде Ресейге стратегиялық артықшылық бермес үшін ақпарат жариялауда «стратегиялық екіұштылыққа» қол жеткізу екенін айтты.

Оның айтуынша, Германия үкіметінің сайтында Киевке жеткізілетін әскери техника тізімін жариялау тоқтауы мүмкін. Бұл тізім 2022 жылғы 21 маусымнан бастап депутаттар мен бұқаралық ақпарат құралдарының қысымымен үнемі жаңартылып келген.  

Фото: ABACA via Reuters Connect