Әзербайжан президенті Ильхам Әлиев 9 мамырда Мәскеуге бармайтын болды, - деп хабарлайды Malim.kz РБК-ға сілтеме жасап.
Бакуде бұл шешімді оның марқұм әкесі, Гейдар Әлиевке арналған іс-шараларға қатысуымен түсіндірді. Ресей президентінің көмекшісі Юрий Ушаковтың айтуынша, Әлиевтің келмейтіні туралы хабарлама түскен.
"Өкінішке қарай, Әлиев келмейді деген хабарлама алдық. Себебін Гейдар Әлиевке арналған ішкі іс-шараларға қатысуымен түсіндірді", — деді ол журналист Александр Юнашевке.
Айта кетейік, 10 мамыр — Гейдар Әлиевтің туған күні. Ол 2003 жылы өмірден өткен.
Сондай-ақ, Лаос басшысы Тхонглун Сисулит де бармайтын болды — ол коронавирус жұқтырып алған.
Бұған дейін Ушаков 9 мамырдағы шараларға 29 елдің көшбасшысы келеді деп хабарлаған. Әлиев пен Сисулиттің келмейтіні анықталған соң бұл сан 27-ге қысқарды.
Фото: Gints Ivuskans / Shutterstock
