Француз тергеушілері Павел Дуровтың бір дирхамды құрайтын жылдық табысы туралы мәлімдемесіне аң-таң болды. Бұл туралы Le Mondе басылымы жазды.
Дирхам – Бірікке Араб Әмірлігінің ақша бірлігі. 1 дирхамның құны біздің ақшамен 130 теңге болады. Айта кетсек, Павел Дуров соңғы жылдары БАӘ-де тұрып жатқан.
Париж прокурорлары Дуровқа бұлтартпау шара тағайындау бойынша өткен сот отырысында Telegram мессенджерінің негізіні қалаушыға кепіл мөлшерін белгілеуді ұсынды. Басында ұсынылған 20 миллион еуроны судья бес миллионға дейін азайтқан.
Жалпы, Дуров үшін мұндай кепіл сомасы аса төмен деп жазады Le Monde. 2023 жылы Дуровтың Дубайдағы қайырымдылық аукционында автокөлік номері үшін 8,5 миллион еуро ұсынғанын бәрі біледі. Telegram-ның негізін қалаған кәсіпкердің байлығы түрлі дереккөздерде әртүрлі бағаланған. Алайда мамандар оның байлығы шамамен 9-15 миллиард долларды құрайды деген пікірде.
Өзі осындай аз пайда табамын десе де, Telegram басшысы мультимиллиардер ретінде танымал. 2014 жылы ол «ВКонтакте» ресейлік әлеуметтік желісіндегі акцияларын сатып, 300 миллион еуро пайда тапқан. Одан бөлек, Дуров Telegram-ның барлық акционерлік капиталын иеленіп отыр. Бірқатар инвестициялық қорлардың бағалауынша, оның құны 30 миллиард доллар.
Фото: oxu.az
