Израиль мен ХАМАС арасындағы атысты тоқтату режимі күшіне енді
Израиль мен Газа секторындағы палестиналық радикалды исламдық қозғалыс ХАМАС арасындағы атысты тоқтату режимі жергілікті уақыт бойынша сағат 12:00-де күшіне енді. Бұл туралы жұма күні, 10 қазанда, Израиль Қорғаныс армиясы (ЦАХАЛ) мәлімдеді, деп хабарлайды Malim.kz.
Келісімнің негізгі тармақтары 24 сағат ішінде жүзеге асырылуы тиіс.
Times of Israel басылымының мәліметінше, Израиль әскері күштерін ішінара әкетіп, жаңа шекаралық аймақтар бойында орналасуда. Израильдік әскери бөлімшелердің алғашқы топтары Газа секторынан түнде шыққан. Кейбір аудандарда әскерді әкету артиллериялық атыс пен әуе соққыларының сүйемелдеуімен өтті.
Reuters агенттігінің хабарлауынша, кей тұрғындар екі жылға созылған соғыстан кейін толық қираған үйлеріне қайта орала бастаған.
Израиль армиясы Газа тұрғындарын кейбір аудандар әлі де өте қауіпті екенін ескертті.
АҚШ президенті Дональд Трамп әзірлеген Газа жоспарының бірінші кезеңі израильдік тұтқындарды босатуды және соған айырбас ретінде палестиналық тұтқындарды босатуды көздейді.
Израиль тарапының мәліметінше, келісім аясында бұрын босатылады деп жоспарланған ФАТХ қозғалысының 11 мүшесінің орнына ХАМАС-тың 11 мүшесі (оның тоғызы өмір бойы сотталған) босатылады. Тізім соңғы сәтте өзгертілген. Сонымен қатар, Израиль 250 палестиналықты және 2023 жылғы 7 қазаннан бері ұсталған 1700 адамды босатады.
Израильдегі теракт құрбандарының туыстары палестиналық тұтқындарды босатуға наразылық білдіріп, босатылатындардың тізімін ашық жариялауды талап етті. Олар ХАМАС мүшелерін босатуды қабылдауға болмайды деп санайды.
Түркия Қорғаныс министрлігі өз әскерилерінің Газаға бітімгерлік миссиясымен баруға дайын екенін мәлімдеді.
Израиль премьер-министрі Биньямин Нетаньяхуның айтуынша, Газа секторында 20 тұтқын тірі, ал 28 адам қаза тапқан. Ол сонымен бірге Израиль армиясы ХАМАС толық қарусыздандырылғанға дейін Газа секторында қалатынын айтты.
Фото: Eyad Baba/AFP/Getty Images
