Михаил Кавелашвили Грузия парламентінде президенттік ант қабылдады

Михаил Кавелашвили жексенбі күні Грузия парламентінің сессия залында «Грузин арманы» партиясы өкілдерінің қатысуымен президенттік ант қабылдады. Ngnewsgeorgia жазуынша, бұл уақытта Грузияның бесінші президенті Саломе Зурабишвили өзінің Атонели көшесіндегі резиденциясында бұл рәсімді фарс деп атады және ол жаңа сайлаулар өткенге дейін заңды президент болып қалатынын мәлімдеді, деп хабарлайды Malim.kz.

Кавелашвилидің инаугурациясы жарты сағаттан астам уақытқа созылып, парламенттің сессия залында өтті. Бұған дейін президенттердің инаугурациялары тек заң шығарушы органның ауласында, көпшілік қонақтардың қатысуымен өтетін.

Рәсімге шетелдік елшілер мен сыртқы қонақтар шақырылмаған.

Шараға сайлау комиссиясының мүшелері, депутаттар, жергілікті өзін-өзі басқару органдарының өкілдері, Аджария мен Абхазияның жоғары кеңестерінің мүшелері, Грузия үкіметінің мүшелері, конституциялық органдар мен Грузияның православ шіркеуінің өкілдері қатысты. Парламент сарайына сондай-ақ, «Грузин арманы» партиясының негізін қалаушы және құрметті төрағасы Бидзина Иванишвили де келген.

Кавелашвили антты өзіне арнап арнайы басылған Конституция нұсқасына қол қойып қабылдады.

Кавелашвилиге қатысты мынадай қызықты деректерді айта кетуге болады. Ол тікелей дауыс беру арқылы сайланған жоқ. Конституцияға сәйкес, Грузия президентінің тікелей сайлаулары енді болмайды. Ал 14 желтоқсанда Кавелашвили президент болып сайланғанда оған оппозиция қатысқан жоқ. Сайлауда одан басқа кандидат болмай, жалғыз өзі қатысып, жеңіске жетті.

Бұрынғы футболшы Тбилисидегі «Локомотив» клубында ойнап бастаған. Кейін «Динамо» клубына өтіп, сол клубпен 6 рет Грузия чемпионы атанған. Жалпы футболшы ретіндегі жолы 2004 жылға дейін жалғасқан.

2015 жылы ол Грузия Футбол федерациясының президенті болуға кандидат болуды жоспарлаған, бірақ жоғары білімі болмауына байланысты сайлауға қатыса алмаған.

Фото: бейнежазбадан скриншот