Трамп америкалық мұсылмандарға ауызашар берді

АҚШ президенті Дональд Трамп Ақ үйде ауызашар беріп, мұсылмандар алдында сөз сөйледі, - деп хабарлайды Malim.kz тілшісі.

Басылым мәліметінше, ауызашар 27 наурызда өткен. Кешкі ас кезінде Трамп президенттік сайлауда өзін қолдаған «америкалық мұсылманға» алғыс айтты.

«Мұсылман қауымы қарашада бізбен бірге болды. Президент болып тұрғанда, мен де сіздермен боламын», – деді Трамп.

Таяу Шығыстағы жағдай туралы айта келе, ол әкімшілігінің «Авраам келісіміне» сүйене отырып, аймақта тұрақты бейбітшілік орнату үшін үздіксіз дипломатиялық жұмыстар жүргізіп жатқанын айтты.

«Бізге керегі – бейбітшілік», – деді Ақ үй басшысы.

Сондай-ақ Трамп барша халық үшін жарқын әрі үмітке толы болашаққа жетуді мақсат ететінін айтты.

«Ақ үйде сіздерді жақсы көретін адам бар», – деді ол.

Айта кетейік, бұған дейін Трамп мұсылмандарды қасиетті Рамазан айының басталуымен құттықтаған болатын. Сол кезде ол әкімшілігі дін бостандығын қорғау жөніндегі міндеттемесін тағы да растайтынын және бұл еркіндік америкалық өмір салтының ажырамас бөлігі екенін мәлімдеген еді.

Фото: abcnews.com