Каспий тартылып барады: апат ауқымы айтылды

Саяхатшы-блогер Нұркен Тәжібай Каспий теңізінің бірнеше жыл бойы түсірілген кадрларын жариялады, деп хабарлайды Malim.kz тілшісі Orda.kz-ке сілтеме жасап.

Әлеуметтік желіде жарияланған видеода «Save Caspian Sea», (Каспийді құтқарайық - еск.) деп жазылған. 

Ақтаудағы теңіз портының президенті Абай Түрікпенбаев атап өткендей, былтыр Каспий теңізі 15 сантиметрге тартылды, ал оған дейін үш жыл қатарынан 20-25 см-ге дейін таязданып отырған. Бұрын мұндай ауқымды таяздану еш байқалмаған.

Әсіресе кейінгі жылдары Каспий теңізіндегі су деңгейінің төмендеуі қатты байқалады. Экологтар бұл процестің негізгі себебі климаттың өзгеруі мен адамның қоршаған ортаға тигізетін әсері дейді. Сарапшылар алдағы онжылдықта Каспий теңізі тез таязданып, бұл аймақты экологиялық апатқа әкелетінін айтып дабыл қағып жатыр. 
Nature Communications Earth & Environment журналында жарияланған неміс және голланд ғалымдарының зерттеуіне сәйкес, 2100 жылға қарай Каспий теңізі тағы 9-18 метрге таязданып, экологиялық проблемалар туындайды.

Айта кетейік, процесті тоқтату мәселесі бойынша сарапшылардың пікірлері әртүрлі. Кейбіреулер мәселеге назар аударып, су ресурстарын ұқыпты пайдалану жағдайында мәселені өзгертуге болады деп есептесе, басқалары бұл процестің қайтымсыз екеніне сенімді.

Фото: Pixabay.com