Биыл пайдаланылмай жатқан 2 млн га жер мемлекетке қайтарылады

Жер ресурстарын басқару комитеті 2025 жылы 2 млн га пайдаланылмаған ауыл шаруашылығы жерлерін мемлекет меншігіне қайтару жөнінде шаралар қабылдайды, деп хабарлайды Malim.kz.

Ауыл шаруашылығы министрлігінің мәлімдеуінше, сондай-ақ, басқа да негізгі бағыттар бойынша жұмыстар жандандырылады.

Мәселен, мемлекет басшысының Бакудегі Климаттық саммитте айтқан бастамаларын жүзеге асыру бойынша көміртекті егіншілікті дамыту жөніндегі жол картасы әзірленіп, бекітіледі. Бұл климаттың өзгеруімен күресудегі және топырақ құнарлылығын арттырудағы маңызды қадам.

2024-2030 жылдарға арналған топырақ құнарлылығын қалпына келтіру және арттыру жөніндегі жол картасын іске асыру жалғастырылады. Құжат 2024 жылы бекітілді. Биыл жердің тозуына қарсы күреске баса назар аудара отырып, Жол картасын іске асыру жөніндегі өңірлік іс-қимыл жоспарларын бекітуге ерекше назар аударылады, деп хабарлады ЖРБК төрағасы Мұрат Теміржанов.

Сондай-ақ Комитет заңнамалық базаны жетілдіру жөнінде шаралар қабылдамақ. Атап айтқанда, мүдделі мемлекеттік органдармен бірлесіп парламентте қаралып жатқан «Топырақты қорғау туралы» заң жобасын одан әрі ілгерілету жөнінде шаралар қабылданады. Бұл топырақты қорғау, олардың сапасы мен құнарлы қабатын сақтау мәселелерін реттеудегі негізгі құжат болады.

Фото: freepik.com