Биылғы 11 айда мемлекеттік бюджетке 19 трлн теңге түсті немесе жоспар 90 пайызға орындалды. Бұл туралы Қаржы вице-министрі Ержан Біржанов Үкімет отырысында баяндады.
Оның ішінде республикалық бюджетке 11,8 трлн теңге немесе жоспардың 82% түсті. Жоспардың орындалмауы салықтар бойынша түсімдердің азаюына байланысты болды, ол 76%-ға атқарылған.
− Жоспардың орындалмауының негізгі себептері: өткен жылдың сәйкес кезеңімен салыстырғанда 10 айда үшінші елдерден импорт көлемінің 6,4%-ға немесе 2,3 млрд АҚШ долларына азаюы және негізгі экспорттық металлдар бағасының арзандауы. Өз кезегінде 602 ірі салық төлеуші бойынша аванстық төлемдер сомасы 27%-ға немесе 267 млрд. теңгеге азайды, − деді Е. Біржанов.
Өткен жылдың тиісті кезеңімен салыстырғанда қосылған құн салығын қайтару 2,5 есе ұлғайып, 981 млрд теңгені құрады. Соған қарамастан, салықтар бойынша атқарылмау көрсеткіштері салықтық емес төлемдердің 1 трлн теңгеге ұлғаюы есебінен өтелді.
− Жергілікті бюджеттердің меншікті кірістері 108%-ға атқарылды және 7,2 трлн теңгені құрады. Жоспар 525 млрд теңгеге асыра орындалды. Өткен жылғы осындай кезеңмен салыстырғанда кірістер 26,5%-ға өсті немесе 1,5 трлн теңгеге көп түсті, - деп түсіндірді вице-министр.
Фото: Pixabay
