Тариф бағасын негізсіз өсірген операторларға қатысты тергеу жүргізіліп жатыр

Елімізде Kcell, Tele2, Beeline сияқты үш ірі байланыс операторлары жұмыс істейді. Алайда кейінгі жылдары операторлардың қызметіне байланысты шағым көп түскен. Тариф бағасын негізсіз өсірген операторларға қатысты тергеу жүргізіліп жатыр, - деп хабарлайды Malim.kz Ult.kz-ке сілтеме жасап. 

Бүгінде тариф бағасының қымбаттауы басты мәселеге айналып отыр.

«Біз нарықты талдап, тарифтердің өсіп жатқанын көріп отырмыз. Кейінгі екі жылда байланыс операторларының барлығы тарифтерін көтерді. Қазір біз олардың арасында баға бойынша сөз байласу дерегін тексеріп жатырмыз. Тарифтердің бір мезетте және жаппай өсуінен бәсекелестік заңнамасының бұзылуы болуы мүмкін, сондықтан тергеу жүргізіліп жатыр», - деді Бәсекелестікті қорғау және дамыту агенттігі төрағасының орынбасары Болат Самбетов.

Сонымен қатар, агенттік бір оператордың монополиялық жоғары тарифтерді белгілеуі мүмкін екенін анықтады. Осыған байланысты бөлек тергеу жүргізілуі мүмкін.

Фото: pixabay.com