8-сынып оқушысын өлтірген жасөспірімдер сотталды

Кәмелетке толмаған айыпталушылар 8-сынып оқушысын көше дәретханасында өлтіргенін ішінара мойындады, деп хабарлайды Malim.kz.

Жамбыл облысының кәмелетке толмағандар ісі жөніндегі мамандандырылған ауданаралық соты бұзақылық және қасақана ауыр дене жарақатын келтіру бойынша айыпталған үш оқушыға қатысты қылмыстық істі қарады.  

Еске сала кетейік, ауыл мектебінің оқушысы көше дәретханасында соққыға жығылғаннан кейін көз жұмған еді. Қайғылы оқиға 2024 жылғы 30 сәуірде Байзақ ауданының Құмжота ауылында болған.  

Сол күні 8-сынып оқушыларының физика сабағы тоқтатылып, дене шынықтыруға жіберілген. Сол сәтте жоғары сынып оқушылары кішілерді шақырып, көше дәретханасында төбелес ұйымдастырып, балаларды жұдырықпен ұрған. Кеудесіне тиген соққылардан сегізінші сынып оқушысы Мирас сол жерде көз жұмды.  

Сот үкімімен айыпталушылар кінәлі деп танылды. Екі кәмелетке толмағанға 6 жыл 8 ай бас бостандығынан айыру жазасы тағайындалды, ал үшіншісіне 1 жыл бас бостандығын шектеу жазасы берілді.  

Сондай-ақ сотталғандардың заңды өкілдері жәбірленуші тарапқа 11 млн теңге көлемінде моральдық зиян өтемақысын төлеуге міндеттелді.

Фото:  t.me/zanamiviehali