Біртанов өзіне шығарылған үкімді қайта қарауды сұрады
Біртанов және оның бұрынғы орынбасары істің қайта қаралуынан үміттенеді, деп хабарлайды Malim.kz. Бас прокуратура қызмет бабын асыра пайдаланғаны үшін сотталған экс-денсаулық сақтау министрі Елжан Біртанов пен оның орынбасары Олжас Әбішевтің өтінішін қалалық прокуратураға жолдады.
Біртанов Е. мен Әбішев О.-ға қатысты қылмыстық іс бойынша сұраныстарыңызға орай хабарлаймыз: Бас прокуратура Әбішевтің жаңа ашылған мән-жайлар негізінде қылмыстық істі қайта қарау туралы өтінішін мәні бойынша қарау және оның уәждерін тексеру үшін Астана қаласының прокуратурасына жолдады, – делінген Malim.kz ресми сауалына Бас прокуратура берген жауапта.
«Тексеру нәтижелері бойынша шешім заңда белгіленген мерзім ішінде – бір ай немесе одан да ұзақ уақыт ішінде қабылданады», – деп нақтылады ведомство.
2024 жылғы 10 маусымда бұрынғы денсаулық сақтау вице-министрі Олжас Әбішев өзі мен экс-министр Елжан Біртановқа қатысты 2022 жылы шығарылған үкім бойынша жаңа дәлелдер пайда болғанын мәлімдеді.
Әбішевтің айтуынша, айыптау үкімі бір ғана куәгердің көрсетілімдеріне сүйене отырып шығарылған. Енді ол бұл көрсетілімдерге қайшы келетін ресми құжаттар бар екенін алға тартуда.
«Біз Бас прокурорға жаңа фактілерді ескере отырып, істі қайта қарау туралы өтініш жолдадық. Барлық дәлелдерді көрсетуге дайынбыз», – деп жазды Әбішев әлеуметтік желіде.
Елжан Біртанов 2017 жылдан 2020 жылдың маусымына дейін Денсаулық сақтау министрлігін басқарды. 2020 жылғы қазанда оны бюджет қаражатын жымқырды деген күдікпен ұстаған. Кейін бұл айып денсаулық сақтау саласындағы бірыңғай платформаны әзірлеу барысында қызмет бабын асыра пайдаланды деген бапқа ауыстырылды. Осы іс бойынша оның орынбасары Олжас Әбішев те тергеуге тартылды.
Тергеу нұсқасына сәйкес, 2018 жылғы желтоқсанда Біртанов пен Әбішев Хорватияның Ericsson компаниясы әзірлеген платформаның орындалған жұмыстары бойынша актілеріне қол қойған. Мемлекет компанияға 1,3 миллиард теңге төлеген. Алайда кейіннен платформаның жұмыс істемейтіні анықталған. Ал айыпталушылар оның жұмысқа жарамды екенін мәлімдеген.
2022 жылғы қазанда сот Елжан Біртанов пен Олжас Әбішевті кінәлі деп таныды. Экс-министр 5 жылға, ал оның орынбасары 4 жылға бостандығын шектеу жазасына кесілді. Екеуі де Денсаулық сақтау министрлігіне 1,3 миллиард теңге көлеміндегі материалдық шығынды өтеуге міндеттелді.
Фото: Закон кз
Ең көп оқылған
