Бопсалаушы «блогерлерге» қатысты 20-дан астам дерек анықталды – ІІМ
Олар өздерін заң мен тәртіпті қамтамасыз ететіндер етіп көрсеткен
Ішкі істер министрлігі «заң мен тәртіп» қағидатын қамтамасыз ету аясында қоғамдық қызметтің атын жамылып, өздерінің арам пиғылдарын көздейтін «блогерлерді» әшкерелеу бойынша 20-дан астам деректі анықтап, жолын кесті, деп хабарлайды Malim.kz.
Көлік полициясының ұйымдасқан қылмысқа қарсы күрес басқармасына теміржол компаниясының қызметкерлері шағымданған. Олар қоқан-лоққы көріп, жүйелі түрде бопсалауға ұшыраған. Өзін «блогер» ретінде көрсеткен күдікті жолсеріктердің әр түрлі заңбұзушылықтарын олардан ақша бопсалау мақсатында түсіріп отырған. Жәбірленушілерге келтірілген жалпы шығын 48 млн теңгеден асқан. Ол бопсалаудың 60 эпизоды бойынша ұзақ мерзімге бас бостандығынан айрылды.
Жетісу облысында жедел уәкілдер құрылыс саласындағы кәсіпкерден 10 млн теңге талап еткен «блогерді» ұстады. Ол тұрғын үй құрылысындағы құқықбұзушылықтар туралы жарияланымдармен қорқытқан. Алматы қаласында сотталған адамнан 10 млн теңге бопсалады деп күдікке ілінген «блогерлер» ұсталып, уақытша ұстау изоляторына қамалды. Одан бұрын супермаркеттер желісіндегі олқылықтарды түсіріп, 27 млн теңге бопсалаған «блогер» құрықталды. Қазір қылмыстық іс сотта қаралып жатыр, деді ІІМ ұйымдасқан қылмысқа қарсы күрес департаментінің өкілі Қуандық Алпыс.
Осыған ұқсас жағдайлар Атырау, Қызылорда және Солтүстік Қазақстан облыстарында анықталған. Барлық күдікті қылмыстық жауапкершілікке тартылған.
Сонымен қатар, Түркістан облысында «блогерлер» қаралайтын мәліметтерді жариялау туралы қоқан-лоққы жасай отырып, оқу орындарының басшыларынан үлкен көлемде ақша бопсалаған. Сот оларға 3,5 жылға дейін бас бостандығынан айыру жазасын тағайындаған.
Фото: видеодан скриншот
