БҚО-да есірткіге қатысты қылмыс көбейген

Батыс Қазақстан облысында былтыр есірткіге қатысты 346 құқық бұзушылық дерегі анықталды, бұл алдыңғы жылдан 247 есе, едәуір көп,-деп хабарлайды Malim.kz.  

БҚО полиция департаменті есірткі қылмысына қарсы іс-қимыл басқармасының бастығы, полиция подполковнигі Марат Сүгіровтің өңірлік коммуникациялар қызметі алаңында өткен брифингіде мәлім еткеніндей, оның 120-сы (2023 жылы — 94) қылмыс, соның ішінде 61-і (33) есірткі затын сату дерегі есебінде тіркелді. 

Оның сөзінше, 119 кг 700 грамм есірткі заты заңсыз айналымнан алынды.

Telegram 2 интернет-дүкен арқылы гашиш есірткі затын заңсыз сатумен айналысқан 5 қатысушыдан құралған ұйымдасқан қылмыстық топ құрықталып, жұмысы тоқтатылды. 500 дайындалған есірткі тәркіленді, мұның 2,5 мыңнан астам дозасы — гашиш. Ақша айналымы 131 млн 922,154 мың болды. Барлық қатысушылар (ұыймдастырушы, есірткі жасырушы, оператор) ұсталып, ҚР ҚК 262-бабына сәйкес сотқа дейінгі тергеу амалдары жүргізілуде, — дейді М.Сүгіров.

Басқарма басшысының айтуынша, 3 қатысушыдан тұратын қылмыстық топтың Алматы облысынан Қазақстанның батыс өңірлеріне есірткі құралдарын жеткізу арнасы жойылды. Олар Алматы облысындағы уақытша тұратын жерінде синтетикалық есірткі құралдары мен психотроптық заттарды дайындайтын жасырын зертхана ұйымдастырған. 5 кг синтетикалық есірткі заты тәркіленіп, бір реттік қолданылатын 15 мың есірткі дозасының жолы кесілді. Сотқа дейінгі тергеу амалдары жүргізілуде.

Облыс бойынша 26 есірткі жасырушы ұсталса, соның жетеуі — жасөспірім. Өткен жылы Қостанай облысының екі тұрғынынан (біреуі — жасөспірім) 2 181 дозаға тең келетін 727 грамм синтетикалық есірткі алынды. Есірткі тектес шөптерді өсірген 5 фитозертхана анықталды. Барлығы 162 есірткі сайты анықталып, бұғатталды. Есірткі затын жарнамалаған 4 адам (біреуі кәмелетке толмаған) қолға түсіп, ҚР ҚК 299-1-бабына сәйкес тергеу амалдары жүргізілуде, — деді М.Сүгіров.

Фото: polisia.kz