2024 жылы Әкімшілік сотқа инвесторлардан 200-дей талап арыз түсті. Бұл туралы Сенатта инвесторлардың заңды мүдделерін қорғау тақырыбын талқылау кезінде сенатор Нұрлан Бекназаров мәлім етті.
Елімізде инвесторлардың құқықтары мен мүдделерін қорғау заңнамалық деңгейде қамтамасыз етілген. Инвесторлар өз құқықтары мен мүдделерін қорғау үшін Қазақстан соттарына, сондай-ақ халықаралық төрелік соттарға жүгінуге құқылы. Олар үшін салық жеңілдіктері, инвестициялық субсидиялар мен кепілдіктер секілді мемлекеттік қолдаудың бірнеше түрі қарастырылған.
Елімізде инвесторлардың құқықтарын қорғау инвестициялық қызметтің дамуы үшін тұрақты және қолайлы жағдайлар жасауға, тең құқықтарды қамтамасыз ету мен экономикалық өсуін ынталандыруға бағытталған. Дегенмен бұл салада белгілі бір проблемалар да жоқ емес. Айта кететін болсақ, Жоғарғы Соты Әкімшілік істер жөніндегі сот алқасының мәліметі бойынша 2024 жылы Әкімшілік сотқа инвесторлардан 200-дей талап арыз келіп түсті. Олардың көп бөлігі салық мәселесі бойынша Қаржы министрлігі мен жер қойнауын игеру мәселесі бойынша Өнеркәсіп және құрылыс министрлігіне қатысты болып отыр, - деді Н. Бекназаров.
Оның айтуынша, инвесторлар басқа мемлекеттік органдар тарапынан қолдау таппай, мәселелері шешілмегендіктен, сотқа жүгінуге мәжбүр болады. Іс жүзінде мұндай істер жиі кездеседі, бірақ олар сотқа жетпейді. Министрліктер оларды сотқа дейін шешуге тырысады. Жоғарғы Сотта инвесторлардың пайдасына істердің 80 пайызы шешіледі.
Депутаттың пайымынша, шетелдік инвесторлардың құқықтарын сақтау Қазақстанның сенімді әріптес ретіндегі оң халықаралық имиджін қалыптастыру үшін маңызды фактор саналады. Біріншіден, заңнаманың тұрақтылығы, әсіресе салық салу және инвестицияларды реттеу бөлігінде қамтамасыз етілуі қажет. Бұл ретте, заңнама анық және түсінікті болуға тиіс.
Заңнамалық актілерде екі түрлі түсіністік пен қайшылықтарға жол бермеу, сондай-ақ олардың жергілікті жерлерде дұрыс іске асырылуын қамтамасыз ету қажет.
Мемлекеттік органдар, лауазымды адамдар қызметінің ашықтығын қамтамасыз ету және олардың жауапкершілігін күшейту мәселесі назардан тыс қалмайды. Инфрақұрылымды дамыту мәселесі маңызды мәселе болып қала береді. Жалпы алғанда, Қазақстанда инвесторлардың құқықтары мен заңды мүдделерін қорғауды жақсарту заңнаманы жетілдіруді, сыбайлас жемқорлыққа қарсы күресті, қолайлы инвестициялық ахуал құруды және дауларды шешудің баламалы тәсілдерін дамытуды қамтитын кешенді шараларды талап етеді. Шетелдік капиталды табысты тарту үшін инвесторларды қолдау мен қорғаудың тиімді жүйесін құру қажет екенін атап өткен жөн, - деді сенатор.
Фото: Kazinform
Байланысты жаналықтар
MalimBlocks
