Қатты соққыдан 15 жастағы жасөспірім ауруханаға жеткізілген. Оқиға дүйсенбі күні болған.
9-сынып оқушысы мектептен шығып, үйіне бара жатқанда қарсы сыныптың үш оқушысы оны таяқтың астына алған. Кастетпен ұрып, жабылып тепкен. Салдарынан жасөспірім орташа ауыр жағдайда Маңғыстау облыстық балалар ауруханасына жатқызылды.
Дәрігерлердің айтуынша, науқастың жағдайы орташа, есін біледі. Ем қабылдап жатыр.
Осы оқиға бойынша жасөспірімнің ата-анасы полицияға шағымданған. Полиция департаменті баспасөз қызметінің хабарлауынша, қылмыстық іс қозғалып, күдіктілер анықталған.
Жанжалдың барлық қатысушылары анықталды. Кәмелетке толмағандар полицияға ата-аналарымен бірге жеткізілді. Қылмыстық іс бойынша қажетті тергеу әрекеттері жүргізіліп жатыр. Сонымен қатар, барлық қатысы бар құқық бұзушылардың ата-аналарының немесе заңды өкілдерінің жауапкершілігі туралы мәселе қаралатын болады. Әкімдік жанындағы кәмелетке толмағандардың құқықтарын қорғау жөніндегі комиссияға жіберу үшін материал дайындалып жатыр. Барлық кінәлілер профилактикалық есепке алынады, — делінген хабарламада.
Фото: видеодан скриншот
