Шығыс Қазақстанда жас жігіт өзінің отбасы мүшелерін қырып салды. Ол жақындарымен бірге ішімдік ішіп, оның соңы жанжалға ұласқан,-деп хабарлайды Malim.kz.
Ашуға булыққан азамат бәрін балталап өлтіріп, қылмыс ізін жасыру үшін үйді өртеген. Қасіретті оқиға Өскеменнің тыныш аудандарының бірінде болған. Түн ортасында өртеніп жатқан үйді сөндіруге төтенше жағдайлар қызметі шақырылды. Алайда өрт сөндірушілер үйіндіні аршып жатқан кезде, жертөледен адамның жартылай күйіп кеткен денелерін тапты.
Оқиға орнына жеткен полиция қызметкерлері өртенген үйдің 76 жастағы иесі, оның 69 жастағы азаматтық жары және 51 жастағы туысының мерт болғанын анықтады. Бірақ өлім өрттен емес еді – сарапшылар дене бас сүйектерінен балта тиген жарақаттарды байқады. Бұл жай ғана өрт емес, қасақана ұйымдастырылған жаппай кісі өлтіру екені белгілі болды.
Тәртіп сақшылары күдіктіні ізін суытпай қолға түсірді. Ол – осы үйде болған 27 жастағы жігіт. Тергеу барысында жігіттің өз атасын, оның жары мен тағы бір жақын туысын балталап мерт қылғаны анықталды.
Қазір оқиғаға байланысты тергеу жүріп жатыр. Полицияның мәліметінше, кісі өлтірудің себептері мен барлық мән-жайларын анықтау мақсатында кешенді сараптамалар жүргізілуде.
Қылмысты жан-жақты зерттеу үшін барлық қажетті тергеу әрекеттері жүргізіліп жатыр. Бұл іс ШҚО полиция департаменті басшылығының жеке бақылауында», – деп хабарлады ШҚО полиция департаменті.
Қылмыс орнынан балта мен пышақ табылып, айғақ зат ретінде тәркіленді. Қазір ҚР ҚК 99-бабының 2-бөлігі – «Аса қатыгездікпен адам өлтіру» бойынша қылмыстық іс қозғалды.
Фото: pixabay.com
