Павлодар маңындағы далада құрғақ шөп өртенді

Павлодар маңында 44 гектар құрғақ шөп өртенді. Өртті сөндіруге он сағатқа жуық уақыт кетті, - деп хабарлайды Malim.kz тілшісі.

Оқиға орнынан түсірілген видеоны куәгерлер Instagram-ға жүктеді. Кадрлардан өрттің "Нұрлы жол" автокөлік көпірі маңындағы далада болғаны көрінеді. Павлодар облыстық ТЖД баспасөз қызметінің мәліметінше, құрғақ шөп пен қамыс 24 наурызда сағат 13:31-де Қарабай ауылы маңында өртенген.

Оқиға орнына Павлодар облыстық ТЖД күштері мен құралдары, ауыл әкімдігіне қарасты өрт сөндіру бекеті, Павлодар орман шаруашылығының қызметкерлері және ерікті өртсөндірушілер жұмылдырылды.

"Өртті сөндіру барысында кейбір ошақтардың қолжетімділігі, көлік жолдарының болмауы және екпінді жел кедергі келтірді. Желдің жылдамдығы секундына 15 метрге дейін жетті. Жалын толықтай 22:57-де сөндірілді. Жалпы, өрт 44 гектар аумақты шарпыды", – деді Павлодар облысы ТЖД Ақсу қаласы ТЖБ аға инженері Ернұр Шаймардан.

Тілсіз жаумен күреске 30-дан аса адам қатысты. Қазір өрт болған аумақ бақылауда, мамандардың айтуынша, оттың таралу қаупі жоқ.

Өрттің себебі анықталып жатыр. Облыстық ТЖД өкілдері әдейі өрт қою немесе отқа ұқыпсыз қарау заң бойынша әкімшілік және қылмыстық жауапкершілікке әкелетінін еске салды.

Бұл – биыл өңірдегі алғашқы алапат өрт. Айта кетейік, ол ыстық ауа райында емес, салқын күнде болған. Күндіз температура 4 градустан аспаған, ал таңертең аздап қар жауған.

Фото: Pixabay.com