Шымкентте университеттегі ақша жымқыру схемасы әшкереленді, - деп хабарлайды Мalim.kz тілшісі.
ҚМА Шымкент қаласы бойынша департаменті М.Әуезов атындағы Оңтүстік Қазақстан университетінде аса ірі көлемде бюджет қаражатын жымқыру және қылмыстық жолмен алынған мүлікті заңдастыру дерегі бойынша қылмыстық істі тергеп-тексеруді аяқтады.
Кімдер ақша жымқырған?
Күдіктілер қатарында ректордың міндетін атқарушы, қаржы және әкімшілік департаменттердің директорлары, сондай-ақ серіктес ұйымдардың басшылары бар.
Шығын сомасы
Тергеу нәтижесінде университет қызмет көрсету, құрылыс-монтаж жұмыстары мен тауар жеткізуге қатысты жалпы сомасы 256 млн теңгеге жалған келісімшарттар жасағаны анықталды.
Бұл жұмыстар іс жүзінде орындалмаған. Бюджет қаржысы жалған актілер негізінде байланысы бар компаниялардың шоттарына аударылып, кейін қолма-қол ақшаға айналдырылған.
Қылмыстық жолмен алынған кірістерге күдіктілер 6 қымбат көлік (Mercedes-Benz S-класс, Lexus LX570 және т.б.) пен Шымкент қаласының орталығынан құны 254 млн теңгеге коттедж сатып алған. Оларға сот санкциясымен тыйым салынды.
Тергеу нәтижесі
4 күдіктіге қатысты үйқамақ түріндегі бұлтартпау шарасы қабылданды.
Қылмыстық іс сотқа жолданды.
Фото: видео кадры
