Шерзат Полаттың өліміне қатысты сот отырысы жалғасып жатыр. Сот отырысында куәгер Алдияр Махметтің күдікті Шынасыл Абзалдың беттестіру кезіндегі видео көрсетілді, - деп хабарлайды Malim.kz тілшісі.
Алдияр Махмет Шынасыл Абзалды танымайтынын, бұрын көрмегенін айтты. Ол оқиға болған күні күдіктіні алғаш көрген.
"Біз шетте тұрдық. Мен, Нұрдәулет, Ахмет, Мирас бәріміз "Қамажай" дүкеніне бардық. Дүкеннің алдында Нұрғанат аға және тағы екі еркек тұрды. Бір уақытта Accent көлігі келді. Машинадан үш жігіт түсті. Біз камераға көрінбейтін жерге, шетке шығып кеттік. Бір кезде Mercedes Benz W140 көлігі келді. Сол уақытта бізге Абзал келді, қасында 2-3 жігіт бар. Ол "Қайсысың менің бауырымды ұрған?" деді. "Біз емес" деп жауап бердік. Ахмет"Ана жақта ағасы тұр, сонымен сөйлес" дегенде, Абзал Ахметтің жағынан ұрды. Ахмет есін жоғалтып, талып қалды. Сол кезде Нұрғанат келіп, Ахметті көтерді. Одан кейін Ахмет екеуіміз артқа екі-үш қадам жасадық. Сонда Абзал Нұрғанаттың басының артқы жағынан екі рет ұрды. Сөйтіп Нұрғанат құлайды. Сол кезде Нұрғанатты тепкілей бастайды. Бір уақытта үш жігіт пышақ алып артымыздан қуып кетті. 50 метрге дейін қуды. Біз бір көшеге кіріп кеттік", – деді Алдияр Махмет.
Сондай-ақ, Алдияр Махмет Шынасыл Абзалдан пышақ көргенін айтты. Күдікті Шынасыл Абзал куәгердің жауабымен келіспейтінін айтты.
Фото: Жоғарғы сот
