Солтүстік Қазақстан облысындағы Ступинка елді мекенінде жеке тұрғын үй өртке оранды, - деп хабарлайды Malim.kz.
СҚО төтенше жағдайлар департаменті баспасөз қызметінің мәліметінше, Шал ақын ауданы Ступинка ауылындағы жеке тұрғын үйде өрт шыққаны туралы 112 пультіне хабар түнде түскен. Газ баллонының жарылуына байланысты шатыр мен төбе жабыны опырылды.
Өрт сөндірушілер келгенде үй жалынға оранып үлгерген. Қазіргі уақытта өрт орнында 2 адамның денесі табылды, олардың жеке басы анықталып жатыр.
Отбасының қалған мүшелері әлі табылған жоқ.
Бүгінде мамандар тілсіз жауды оқшаулады. Өрттің ауданы шамамен – 104 шаршы метр.
Фото: СҚО ТЖД
