Аймағамбетов балабақшаларды тексеруге енді жетті

Министрдің сөзінше, ведомство осы кезге дейін балабақшаларға қойылатын талаптарын күшейтіп, лицензиялау мен мемлекеттік бақылауды қайтаруға тырысып-ақ келген. Алайда сол кезде кәсіпкерлер палатасы, балабақшалар қауымдастығы мен бірқатар мемлекеттік орган бұл норманы заңға енгізуге кедергі жасаған. Биыл министрлік алдынан кедергі кеткен болу керек, себебі енді балабақшаларға қойылатын талаптар күшейеді екен.

«Қазір бес негізгі бағыт бойынша жұмыс істеп жатырмыз:
1. Лицензиялауды қайтару. Бұл мәселе бойынша депутаттардың, қоғам мен мемлекеттік органдардың қолдауына үміт артамыз.
2. Жұмыс жағдайлары мен сапасын тексеріп, барлық балабақшаны аттестациялаудан өткізу.
3. Балабақшаларға мемлекеттік тапсырыстарды орналастыруға қойылатын талаптарды күшейту.
4. Мектепке дейінгі мекеме қызметкерлерінің кадрлық әлеуетін арттыру. Колледждер мен ЖОО-ларда мамандарды даярлау сапасын арттыру.
5. Мектепке дейінгі білім берудің жаңа моделі бойынша бағдарламалардың мазмұнын жаңарту», - деп жазды Аймағамбетов.

Сонымен қатар, балабақша тәрбиешісі мамандығына деген қызығушылық та азайған. Осыған орай министрлік тәрбиешілердің жалақысын өсіріп, олардың жұмыс кестесін реттеуді қолға алмақ.

Айта кетейік, осыған дейін кәсіпкерлікті қолдау бағдарламасы аясында мемлекет жекеменшік балабақшаларда тексеру жұмыстарын жүргізе алмайтын. Бұл бағдарлама елдегі балабақша санын арттыру үшін ашылған. Он жыл ішінде 3 жастан 6 жасқа дейінгі балалардың 99%-ы балабақшамен қамтылған. Алайда ол балабақшалардың жартысы техникалық және санитарлық талаптарға сай келмейтін ғимараттарда, білікті мамандарсыз және қауіпті жағдайларда ашылғанын министрдің өзі мойындап отыр. Былтыр балабақшалардың 80%-ы мемлекеттік аттестациядан өте алмаған.