Алматы облысында Ворошилов су қоймасының бөгеті бұзылды
Алматы облысы, Іле ауданындағы Ворошилов су қоймасының бөгеті бұзылды. Қазірде су Байкент ауылдық округі маңындағы Жармұхамет өзенінің арнасымен ағып жатыр. Жағдаймен танысу үшін оқиға орнына облыс әкімі Марат Сұлтанғазиев пен Төтенше жағдайлар департаменті басшысы барған.
Облыстық Төтенше жағдайлар департаменті «әзірге ауылдарды су басу қаупі жоқ» дейді.
«Қазіргі уақытта жақын елді мекендерді су басу қаупін нақтылау жұмыстары жүргізілуде. Су Жармұхамет өзенінің негізгі арнасымен және ары қарай тоғандармен кетеді. Онда транзиттік режимде суды ағызу үшін барлық шлюздер ашық тұр. Қауіп төніп тұрған жоқ», - деп хабарлады Алматы облысы әкімдігі.
Ворошилов су қоймасына 1 миллион текше метр су сыяды. Тереңдігі 10 метр. Қойма жанындағы Байкент ауылында 7 мың, Қараой ауылында 5 мың адам тұрады.
Фото: aikyn.kz
