Әскерилер бір тәулікте су тасқыны қауіп төндірген аймақтардан 222 адамды алып шыққан
Қорғаныс министрлігінің ұшқыштары су тасқыны кезінде тұрғындарды эвакуациялаумен және оларға гуманитарлық көмек жеткізумен айналысып жүр.
Құтқару жұмыстары Ақтөбе, Қостанай және Абай облыстарында жалғасып жатыр. Бұл туралы ҚР Қорғаныс министрлігі хабарлады.
Министрлікке қарасты 7 тікұшақ құрамы тәулік бойы жұмыс істеуде. Оның сыртында, табиғи апат аймақтарына салмағы 1 тонна болатын құтқару құрал-жабдығымен жарақталған 19 қызметкер жөнелтілген.
Наурыздың 30-күні әскери ұшқыштар 38 рет көкке көтеріліп, 222 адамды құтқарған. Ұшу уақыты 15 сағатты құраған.
Бірнеше күн ішінде әскери тікұшақтар үйлерін су басып, қиын жағдайда қалған халыққа 10 тонна азық-түлік, киім-кешек сияқты гуманитарлық көмек жеткізген.
Фото: ҚР Қорғаныс министрлігі
