Денсаулық сақтау саласы 700 миллиард теңге қаржысын ала алмай отыр – Бердіқожаев
Қазақстанда денсаулық сақтау жүйесіне биыл бөлінген қаражаттың төрттен бірі әлі игерілмей отыр. Бұл туралы танымал нейрохирург Мыңжылқы Бердіқожаев "Ой-лайық" ютуб арнасына берген сұхбатында айтты деп хабарлайды Malim.kz.
«Егер жаңалықтарды қарап отырсаңыз, біздің денсаулық сақтау саласына шамамен 3 триллион теңге бөлінеді. Қазірге дейін сол қаржының 65–70 пайызы игерілуі керек. Ал бүгінгі таңда денсаулық сақтау саласы 700 миллиард теңге көлеміндегі қаражатты алмады. Бұл дегеніміз — жоспарланған қаражаттың 25 пайызы жетпей жатыр деген сөз. Егер осылай жалғаса берсе, денсаулық сақтау жүйесі өте үлкен қиындыққа тап болуы мүмкін», – деді дәрігер.
Оның айтуынша, мемлекеттік ауруханаларды толықтай дотация мен субсидия арқылы ұстап тұру жүйесі тиімсіз болып барады.
«Мемлекет берген қаржыға жете алмай отыр, ал жеткен қаражаттың өзі талан-таражға түсіп кетеді. Бұрын жеке медициналық орталықтар жақсы жұмыс істейтін. Бірақ кейін олар да мемлекеттік квотамен жұмыс істеген соң, айырмашылық қалмады», – деді Бердіқожаев.
Фото: видеодан скрин
