Грекия аралындағы өрт: яхтада болған қазақстандықтарға айып тағылды

Грекия прокурорлары өткен аптада Сарон теңізіндегі Гидра аралында өрт қоюға қатысы бар жеке яхтадағы 8 ересек қазақстандық жолаушыны айыптады. Олардың арасында болған кәмелетке толмаған екі бала сотқа тартылмады, деп хабарлайды Malim.kz.

Ekathimerini.com сайтының жазуына қарағанда, Грекия билігі Қазақстанға көмек сұрап жүгінген, себебі яхтаны жалға алушылар Грекиядан билік тарапынан тергеуге алынбастан кетіп қалған.

Айыптауды шығаруға прокурордың өрт орнында тағайындаған сот-медициналық сараптамасы кезінде табылған жаңа дәлелдемелері түрткі болды. Өрт сөндірушілер өрт шыққан шығанақта отшашулардың қалдықтарын тапқаны хабарланды, деп жазды шетелдік басылым.

Ал яхта капитаны мен бірінші көмекшісі ұсталған, қалған экипаж мүшелері шектеулермен кепілге босатылған.

Сонымен бірге, Пирей прокуратурасы Гидра өртіне қатысты іс бойынша өртті сөндіру және порт билігінің әрекеттеріне қатысты алдын ала тергеуді бастады. Яхтаны жалға алушылардың өртке қатысы бар деген күдікке алынуына қарамастан Грекиядан кетуіне мүмкіндік берген кез келген олқылықты тексеру назарға алынып жатыр.

Айта кетейік, аталған аралдағы өртке қазақстандықтардың қатысы бары туралы ақпарат өткен жолы жарияланған еді.

Алайда СІМ ұсталғандардың арасында қазақстандықтар жоқ екенін мәлімдеді.

Дегенмен OCCRP (Сыбайлас жемқорлық пен ұйымдасқан қылмысты зерттеу орталығы) тәуелсіз журналистер ұйымының зерттеуі бойынша Persephony I яхтасының қонақтары арасында еліміздегі ең бай бизнесмендердің бірі Данияр Әбілғазин болған. 

Одан басқа Әбілғазиннің ұлы мен оның әйелі әрі Қазақстандағы ең ірі қайырымдылық қорларының бірінің жетекшісі Айдан Сүлейменова мен оның орынбасары болғаны көрсетілген.

Басқа қонақтар арасында Халық банкінің басқарма төрайымы Үміт Шаяхметова, сондай-ақ оның күйеуі, KMG International NV мұнай компаниясының бұрынғы топ-менеджері Бейімбет Шаяхметов пен олардың қызы да бар.

Фото: ekathimerini.com