Арменияның премьер-министрі Никол Пашинянның ұлы Әзірбайжанмен қарулы қақтығыс болып жатқан Таулы Қарабаққа аттанды. Бұл туралы Sputnik Армения-ға сілтеме жасап, Malim.kz хабарлайды.
Пашинянның жалғыз ұлының ұрыс болып жатқан аумаққа кеткені жайлы анасы Анна АКОПЯН хабарлапты.
«Оған айттым: «иә, балам, форма ки де бар. Сені жақсы көрем, бірақ, еліңді қорғаудан асқан ештеңе жоқ», дедім. Бұл жақта жағдай қалай боларын, сосын ол жақта байланыс бола ма, жоқ па, білмеймін. Қазірше, оның ұрысқа баратындай қажеттілік жоқ екені белгілі болды. Бірақ, мен бұл сөзді қай кезде де айтар едім», - дейді Акопян.
Оның айтуынша, жалғыз ұлының майдан даласына баратынын, қазір формасын дайындап, резервте тұрғанын Никол Пашинянның өзі айтыпты. Ал, шешесі оны қолдаған.
Айта кету керек, 27 қыркүйектен бері Әзірбайжан мен Армения қарулы қақтығысқа жол беріп, екі елдің 1988 жылдан бері таласып келе жатқан Таулы Қарабақта соғыс жағдайы енгізілген. Осыған орай, Армения президенті елде жалпы мобилизация мен әскери жағдай жариялаған.
Армения басшысының ұлы Ашот Пашинян 2018 жылы әскер қатарына барып, отан алдындағы борышын өтеп келген. 9 шілде күні ғана әскер қатарынан қайтқан кіші Пашинян енді қайтадан формасын кимек. Ол әскерге барады дегенде басшысының жалғыз ұлының әскерге баруы - Армения армиясының рейтингін көтереді деген пікірлер айтылған.
Ал, басылымның жазуынша, қазір Арменияда Таулы Қарабаққа баруға сұранған еріктілер саны аз емес. Армения президенті ұлының соғысқа баруға дайын екенін айтып, бәлкім, Армения армиясын тағы бір сергітіп алғысы келген шығар...
