Марқұм Шерзат Болаттың әпкесі Перизат Нұрымованың отбасы жаңа баспанаға қол жеткізді, деп хабарлайды Malim.kz.
Қуанышты жаңалықты белсенді Дінмұхамед Қаматай әлеуметтік желідегі парақшасында жазды. Ол Перизат Нұрымова мен оның отбасының ауыр кезеңді бастан өткергенін атап өтті. Осы қиын сәтте қазақстандықтар оларға көмек қолын созып, жаңа үй алып берді.
"Бұл үй – жай ғана баспана емес, жаңа өмірдің бастауы. Алты баланың анасы Перизаттың болашағына сенімділік ұялатуға тырыстық. Бұл қадам оларға жаңа өмір бастауға мүмкіндік береді. Осындай қиын сәтте қолдау көрсету – баршамыз үшін маңызды. Бастаманы қолдаған барлық жанашыр жандарға алғыс білдіреміз!" – деді Қаматай.
Өз кезегінде Перизат Нұрымова да игі іске үлес қосқан қазақстандықтарға шынайы алғысын жеткізді:
"Барша халқыма алғысым шексіз. Бізге қолдау көрсеткен барша жанашыр азаматтарға ризашылығымды білдіремін."
Фото: видеодан кадр
