Қазақстанда жыныс ауыстыруға бола ма?
Үкімет басшысы мәжілісмен Магеррам Магеррамовтың депутаттық сауалына жауап берді
Қазақстанда жыныс ауыстыру операциялары жүргізілмейді. Бұл туралы премьер-министр Олжас Бектенов мәлімдеді, деп хабарлайды Malim.kz.
Үкімет басшысы мәжілісмен Магеррам Магеррамовтың депутаттық сауалына жауап берді. Депутат елімізде қанша адамның жынысын хирургиялық жолмен өзгерткені туралы сұрап, мұндай процедураларға тыйым салу қажет деген ұсыныс білдірген болатын.
Ақпан айында депутат Парламентте сөйлеген сөзінде жыныс ауыстыруға ұмтылатын адамдардың психикасы мен мінез-құлқында ауытқулар болуы мүмкін деген пікір айтқан. Ол бұл жағдайға алаңдаушылық білдіріп, жыныс ауыстыру операцияларына және гормондық терапияға тыйым салуды талап еткен.
Премьер-Министрдің айтуынша, қазіргі уақытта Қазақстанда жыныс ауыстыру мақсатында хирургиялық операциялар жүргізілгені жөнінде бірде-бір дерек тіркелмеген. Сонымен қатар, мұндай медициналық қызметтер Міндетті әлеуметтік медициналық сақтандыру (ОСМС) аясында да көрсетілмейді. Яғни мемлекет тарапынан бұл бағыттағы емшаралар қаржыландырылмайды.
Осы мәселеге қатысты, қажет болған жағдайда, мемлекеттік органдар депутаттар корпусымен бірлесе отырып заңнамаға өзгерістер енгізу мүмкіндігін қарастыруға дайын, – делінген ресми хабарламада.
Айта кету керек, 2019 жылдан бастап Дүниежүзілік денсаулық сақтау ұйымы трансгендерлікті психикалық ауытқулар санатынан алып тастаған. Ол қазір Аурулардың халықаралық классификациясының (МКБ-11) тізіміне психикалық дерт ретінде енгізілмейді.
Фото: pixabay.com
MalimBlocks
