ШҚО-да болашағы жоқ бірнеше ауыл жабылды
Шығыс Қазақстан облысында даму әлеуеті жоқ бірнеше елді мекен ресми түрде таратылды. Ауылдарды тарату туралы шешім облыстық мәслихат сессиясында қабылданды. Бұл туралы Stan.kz сайтына сілтеме жасап Malim.kz хабарлайды.
Осылайша Алтай ауданындағы үш ауыл – Соловьев ауылдық округіндегі Ленинск, Малеев ауылдық округіндегі Ландман және Парыгин ауылдық округіндегі Кутиха ресми түрде елді мекендер тізілімінен алынды. Сондай-ақ Шемонаиха ауданындағы Заречное және Рулиха ауылдары да жойылды.
Мәслихаттың хабарлауынша, бұл ауылдар көршілес елді мекендердің құрамына енгізілді:
Ленинск – Подорленок ауылының құрамына;
Ландман – Малеев ауылының құрамына;
Кутиха – Парыгино ауылының құрамына қосылды.
Ал Шемонаиха ауданында Заречное ауылы Усть-Таловка кентінің құрамына енсе, Рулиха станциясы Каменев ауылдық округіне берілді.
“Бұл шешім тұрғындардың және қажет инфрақұрылымның болмауына байланысты қабылданды. Барлық әкімшілік мәселелер мен жер есебі жақын маңдағы елді мекендердің қарамағына өткізілді”, – делінген хабарламада.
Айта кетейік, бұған дейін Алматы облысында бүтін бір елді мекен жекенің қолына өтіп кеткені туралы жазған едік.
фото: freepik.com
