Құлсарының экс-әкімі туралы видео жарияланды

Әлеуметтік желілерде Атырау облысы Құлсары қаласының экс-әкімі Қаржау Шарғабаевтың видеосы тарап жатыр.

Видео Telegram-каналдарда жарияланған. Кадрларда Құлсары қаласының экс-әкімі Қаржау Шарғабаев бір буманы көрсетіп, оны бөгде адамдардың  сұрауы бойынша алуға келгенін айтады. Ер адамның айтуынша, оған кішкентай пакетте дәрі бар екенін айтқан. Экс-әкім видеоны түсіріп тұрған басқа адамның сауалдарына жауап береді, ал Қаржау Шарғабаевтың бетінен көгерген іздер байқалады. 

Кейін Шарғабаев өзінің   Facebook  парақшасында 19 мамырда біреулер шабуыл жасағанын айтып, үндеу  жариялады. Оның айтуынша, бейтаныс адамдар оны ұрып-соғып, осылай айтуға  мәжбүрлеген. Шарғабаевтың  денесінен ұрып-соғу белгілері байқалады.   

Аталған жағдай бойынша Malim.kz тілшісі Атырау облысы полиция  департаменті баспасөз қызметіне хабарласты. Полиция департаментінің мәліметінше,   бұл әрекетке қатысты тергеу-тексеру жүргізіліп жатыр. Өзге ақпарат ҚР Қылмыстық кодексінің 201 бабына сәйкес жариялауға жатпайды.