Украина Ішкі істер министрі Игорь Клименко Ресейдің Кривой Рог қаласына зымыранмен жасаған шабуылынан 11 адамның жарақат алғанын хабарлады. Бұл туралы ВВС жазды.
«18:20-ға дейін бір адамның қайтыс болғаны белгілі. Тағы 11 адам жарақат алды, олардың арасында 16 жастағы қыз бар», – деп жазылған Ішкі істер министрінің телеграм-арнасындағы хабарламада.
Министр Ресейдің зымыраны төрт қабатты тұрғын үйдің бір бөлігін толық қиратып кеткенін хабарлады. Сонымен қатар, дүкендер, 20-дан астам көлік және көрші үйдің терезелері зақымдалған.
«Рождество алдындағы кеште жау Кривой Рог қаласындағы тұрғын үйге соққы жасады. Отбасылар мерекені жақындарымен бірге қарсы алу үшін үйлеріне қайтып келе жатқанда, Ресей тағы да қатігездікпен адамдарды өлтіріп жатыр», – деп жазды Украина Ішкі істер министрі.
Украина өткен жылдан бастап Рождествоны әлемнің көпшілігімен бірге 25 желтоқсанда атап өтеді. Рождествоны 7 қаңтардан 25 желтоқсанға ауыстыру туралы жарлықты Украина президенті Владимир Зеленский 2023 жылы жазда шығарған.
