Созақ ауданын Шу өзені арқылы сумен қамту: министрлік Толықбайдың сауалына жауап берді
Су ресурстары және ирригация министрлігі Мәжiлiс депутаты Мақсат Толықбайдың Түркістан облысы Созақ ауданын Шу өзені арқылы сумен қамту бойынша депутаттық сауалына қатысты жауап берді
Су ресурстары және ирригация министрлігі Мәжiлiс депутаты Мақсат Толықбайдың Түркістан облысы Созақ ауданын Шу өзені арқылы сумен қамту бойынша депутаттық сауалына қатысты жауап берді, - деп хабарлайды Мalim.kz тілшісі.
Министрлік мәліметінше, су ресурстары және ирригация министрі Нұржан Нұржігітовтің тапсырмасы бойынша Жамбыл облысының "Қазсушар" филиалы мен Шу-Талас бассейндік инспекциясының басшылары Созақ ауданына барған. Тексеріс барысында Шу өзені арнасын өз бетінше бұру және заңсыз бөгет тұрғызу дерегі анықталмаған.
Барлық суармалы алқап және су пайдаланушы су ресурстарының бөлінген көлемінде (лимитте) сумен қамтамасыз етіліп жатыр.
"Атап айтқанда, 2024 жылғы қыркүйектен бастап Тасөткел су қоймасынан Шу өзенінің төменгі арнасына 1 млрд 356 млн м3 су жіберілді. Жыл аяғына дейін тағы 44 млн м3 су жіберу жоспарланып отыр. 2025 жылғы 27 наурызда Шу өзенінің суы Созақ ауданының Жуантөбе ауылдық округіне жетті. Қазір су аудан шекарасынан 80 шақырым ішке қарай таралып жатыр", - делінген жауапта.
Министрлік мәліметінше, бейнежазбада көрсетілген бөгет, Мойынқұм ауылдық округінің тұсында 1970 жылдары салынған және оны су шайып кетпес үшін жергілікті әкімдік жыл сайын нығайту жұмыстарын жүргізеді.
"Радай өзегі бойындағы бөгет Шу өзенінің суын Созақ ауданына жіберу және 10 мыңға жуық тұрғыны бар Комсомол және Мойынқұм елді мекендерінің тұрғындары мен шаруа қожалықтарын су шайып кету қауіпінен сақтау мақсатында бой көтерген. Шу өзеңінің ағысын реттеу және бөгеттің бұзылуының алдын алу үшін Радай өзегінің басына су реттегіш құрылғы орнату туралы шешім қабылданды. Бұл құрылғы судың табиғи ағысын кезең-кезеңімен, қауіпсіз және тиімді басқаруға, суды Шу өзеңінің негізгі арнасымен жіберу және Созақ ауданына суды жеткізу уақытын азайтуға бағытталған", - делінген жауапта.
Қазір жергілікті әкімдік жобалық-сметалық құжаттамасын әзірлеп жатыр.
Айта кетейік, аудан әкімдігінің мәліметінше, Шу өзенінің бойындағы Мойынқұм ауданы аумағында 68 шағын шаруа қожалығы және жалпы саны 7500 ірі қара малы бар екі ірі ЖШС бар.
Су ресурстары және ирригация министрлігі Шу өзеңінің бойында орналасқан аудандарға тұрақты түрде су жеткізуді басты міндеттердің бірі деп санайды.
Осыған орай, Шу өзенің алдағы жылда сумен қамтамасыз ету үшін Тасөткел су қоймасына 470 млн м³ су жинау жоспарланып отыр.
Өзен бойында 500 су сорғы бар, заңсыз қойылған 17 су сорғысы анықталып, айыппұл салынды.
Еске салайық, Мәжіліс депутаты Мақсат Толықбай Жамбыл облысындағы су мәселесін қозғап, Су ресурстары және ирригация министрі Нұржан Нұржігітовке депутаттық сауал жолдаған еді.
Фото: Видео кадры
