Қазақстан биыл Ресейге көп ақша төлеп, аз су алады.
Батыс Қазақстан облысының әкімі Ғани Исқалиевтің сөзінше, Қазақстан биыл Ресейге былтырымен салыстырғанда көп ақша төлеп, аз су алған. Себебі қаржының басым көпшілігі суға емес, су айдайтын насос станциясына кеткен.
«Былтыр 180 миллион кубметр су үшін үш миллиард теңге төледік. Биыл су үшін Ресей тарапына 4,2 миллиард теңге төлеу жоспарлануда. Бұл қаржыға 180 миллион емес, 140 миллион кубметр су болады. Су Саратов облысынан келеді. Ол жақта электр энергиясының тарифі қымбаттаған. Суды Жайық өзенінен 92 метр биіктікке шығарады. Біз насос станциясының шығындарын да төлеуге мәжбүрміз», - деді Исқалиев кеше елорда да өткен баспасөз брифингінде.
Су мәселесінде Батыс Қазақстан облысы Ресейдің Саратов және Волгоград облыстарына тәуелді. Жыл сайын БҚО Саратовтан – 54 млн метркуб, Волгоградтан – 28 млн метркуб су алады. Бірақ бұл су жеткіліксіз. Батыс Қазақстанды толық сумен қамтамасыз ету үшін қосымша 131 млн метркуб су қажет. Қазақстан Ресейден 1 метркуб суды 4,6 рубльге сатып алады. Наурызда премьер-министр Асқар Мәмин Ресейден су сатып алуға қатысты мәлімдеме жасаған. Онда ол «Батыс Қазақстан облысына Ресейден 131 млн метр куб су сатып алуға байланысты 3,5 млрд теңге қаржы бөлу мәселесі 2021 жылға арналған бюджеттің мүмкіндігіне қарай қарастырылатынын» айтқан.
Наурызда Ресей Федерациясы Орынбор қаласын сумен қамтамасыз етуді жақсарту мақсатында Орал өзеніне бөгет салатыны жөнінде ақпарат тараған. Болжам бойынша, бөгет құрылысына 300 миллион рубль жұмсау жоспарланған.
Еуропаның ұзындығы жағынан үшінші өзені болып саналатын Оралдың суы онысызда жыл өткен сайын азайып барады. 2010 жылдан бері өзен 2,5 метрге төмендеген. Қазірдің өзінде Оралдың бойында 12 су бөгеті бар. Өзен суының тартылуы өткен ғасырдың 70-ші жылдарынан басталған. Қазір жұмыс істеп тұрған 12 бөгеттің әрқайсысының көлемі 10 млн метр кубты құрайды. Экобелсенділер бұл алдағы уақытта экологиялық қиындықтармен қоса, Қазақстанның су қауіпсіздігіне де үлкен соққы болуы мүмкін екенін айтқан.
