Фото: REUTERS
Украина президенті Владимир Зеленский Брюссельде өткен баспасөз мәслихатында Владимир Путиннің «тікелей байланыс» кезінде айтқан сөздеріне пікір білдірді. Ресей президенті жаңа зымырандық кешен «Орешник» туралы мәлімдеме жасап, онымен Киевті атқылап, жоғары технологиялық «дуэль» ұйымдастыруды ұсынған болатын. Бұл жөнінде ВВС агенттігі жазды.
Зеленский Путиннің бұл ұсынысын өткір сынға алды: «Сіздер біздің кіммен істес болып жатқанымызды көріп отырсыздар ма? Бүгін «Кремльдегі жолдас» жоғары технологиялық дуэль ұйымдастыруды ұсынды. Ол «Біз, мысалы, Киевке жаңа «Орешник» зымыранымен соққы жасаймыз, ал олар өздерінің әуе қорғаныс жүйесін қойсын. Сосын не боларын көреміз» дейді. Сонда бұл адамды адекватты деп санайсыздар ма? Бұл жай ғана ессіздік», – деді Зеленский.
Путин өз сөзінде «Орешник» зымыранын ешкім атып түсіре алмайтынын және бұл туралы «жоғары технологиялық дуэль» ұйымдастыруды ұсынған болатын. Оның пікірінше, Украина Киевке әуе қорғаныс жүйелерін шоғырландырып, Ресейдің «Орешник» зымыранымен соққысын күтіп алу керек, осылайша, ХХI ғасырдағы «технологиялық тәжірибе» жасалуы мүмкін екен.
Путин бұл идеяны, шын мәнінде, «технологиялық дуэль» деп атады, бірақ Зеленский бұл ұсынысты агрессия мен ессіздік ретінде бағалады.
