Фото: euronews.com
Украина президенті Владимир Зеленскийдің айтуынша, Курск облысында Ресей жағында соғысып жатқан 3000-нан астам солтүстіккореялық сарбаз қаза тапты немесе жарақат алды. Оған дейін Оңтүстік Кореяның барлау қызметі Пхеньянның Мәскеуге көмек көрсету үшін қосымша әскер мен қару-жарақ жіберуге дайын екенін хабарлаған болатын. Бұл жөнінде euronews.com сайты хабарлады.
Зеленский 23 желтоқсандағы кешкі үндеуінде Ресей мен Солтүстік Корея арасындағы ынтымақтастықтың күшеюі Корея түбегіндегі және оған жақын аймақтардағы тұрақтылыққа қауіп төндіретінін атап өтті. Ол Солтүстік Кореяның Ресей армиясына қосымша сарбаздар мен әскери техника жіберуі мүмкін екенін айтып, бұл жағдайға жауап берілетінін мәлімдеді.
Оңтүстік Кореяның Біріккен штабтар комитеті Солтүстік Кореяның Ресейге қосымша әскери күштер мен қару-жарақ, соның ішінде камикадзе дрондарын жіберуге дайындалып жатқанын хабарлады. Олардың айтуынша, Солтүстік Корея 240 мм зымыран жүйелері мен 170 мм өздігінен жүретін артиллерияны да жеткізіп жатыр.
Киев, Вашингтон және Сеулдің мәліметі бойынша, Ресейде 12 000-ға жуық солтүстіккореялық әскер болған, олардың кем дегенде 1100-і қаза тапты немесе жарақат алды. Украина арнайы операциялар күштері Ресей жағында соғысатын солтүстіккореялық сарбаздарға жалған әскери куәліктер берілгенін хабарлады. Бұл құжаттарда орыс есімдері, туған жерлері мен жазулары көрсетілген, бірақ фотосурет пен мөрлер жетіспейді, ал қолтаңбалар корей тілінде жасалған, бұл сарбаздардың шын мәнінде Солтүстік Кореядан екенін растайды.
