Әкеме операға шақырту апарғанда дүниеден өтті - Майра Мұхамедқызы

Белгілі опера әншісі Майра Мұхамедқызы «Алғашқы» жобасына берген сұхбатында әкесінің дүниеден өткен кезін айтып берді, деп хабарлайды Malim.kz.

Әкем «Мына ағайын бауырларыңа ие бол. Қазақстанға сен деп келді» деп өсиет айтатын. Ол жақта да жақсы өмір сүрдік. Бірақ отанына деген сағынышты өзі де айтатын. Мынау сары даланың бір жерінен, Алатаудан жер бұйырса, арманым жоқ деп. Екеуі қатар жатыр сол таудың басында. Армандарына жетті, - дейді өнер иесі.

Опера әншісі әкесі дүниеден өткен күні сахнада өнер көрсеткенін де жасырмады.

Абай атындағы опера және балет театрында 20 жыл жұмыс істедім. Сол театрдың 80 жылдық мерейтойы болған кезде фестиваль өткізетін болдық. Шетелден қонақтар шақырылды. Сөйтіп кешкісін ата-анама шақыру алып бардым. Сонда әкем «балам, бері келші, мен кетіп қалатын сияқтымын» деді. Мен «Қайда, Қытайға барасыз ба?» деппін. Әкем сап-сау болатын. Сонда «Ата-анам келіп тұр, есіктің алдында тұр» дейді. Сол әңгімеден кейін таңғы 5-те жүріп кетті. Сол күні көзімнің жасын сығып-сығып, операмды айттым. Бұл өмірімдегі ең қиын кез болды, операны қалай айтып шыққанымды білмеймін, - дейді Майра Мұхамедқызы.

Фото: әлеуметтік желі