«Америка мен Англияға шақырды»: Нұржан Қалжан өнердегі өкінішін айтты

Танымал әнші Нұржан Қалжан шетелден бірнеше рет шақырту алғанын, бірақ тәуекел етіп, шешім қабылдамағанына өкінетінін айтты. Әншіні көруге АҚШ-тан Майкл Джексонның алғашқы продюсері келген, деп хабарлайды Malim.kz.

Өнерге эстрада емес, дәстүрлі әнші болып қадам бастым. Марқұм композитор Арман Дүйсенов ағамыз бірден бір септігін тигізді. Түркістанда, Алматыда байқауларға қатысып, жеңгеннен кейін Қытайға бардым, ол жақтан да жеңіспен қайттым. Қытайдан келгеннен кейін АҚШ-тан Майкл Джексонның алғашқы продюсері келді. Олар мені Америкаға жұмысқа шақырды, «2 жыл тіл үйренесің, кейін ән жазып, шығарамыз, әндерің хит болып, әлемдік деңгейдегі жұлдызға айналасың» деді. Мен ол уақытта Қыдырәлі Болманов ағамызбен жұмыс істеп жүрген едім. Шыны керек, ол кезде бір ауыз орысша білмейтін ауылдан келген бала болдық. Содан «орысшаны өзім білмеймін, ағылшыншаны мүлдем білмеймін, ол жаққа барып қалай ән айтамын? Қалай болады?» дедім де, «білмеймін, көрейін» дедім. Содан 2 жылдан кейін Қыдырәлі ағаның продюсерлігінен кеттім, - дейді әнші.

Өнер иесінің продюсерсіз жүргенін естіп, АҚШ-қа шақырған кісілер қайта хабарласқан. Алайда әнші екінші шақыртудан да бас тартқан.

Әлі күнге дейін сол шешіміме өкінемін, "құрып кетсем де, баруым керек еді" деп ойлаймын, өзегімді өртейтін осы өкініш бар, – деді әнші. 

Әнші «Бұлбұл құс» әнімен танымал болғаннан кейін Ұлыбританиядағы қазақстандықтар да әншіге ұсынысын айтқан.

Олар «осы ән Ұлыбританияда жақсы тарап жатыр, осы әнді енді ағылшынша жазсақ, бүкіл әлемге танылады, миллионер боласың» деді. Тура сол уақытта өмірімде қиындық көбейіп, ол да кейінге қалды, – деді әнші.

Фото: Видеодан скрин