«Ешқандай қызымды бермеймін». Әнші Абай Бегейдің қызын алып қашып кеткен

Танымал әнші Абай Бегейдің ортаншы қызын алып қашып кеткен. Бұл туралы әншінің жұбайы Фариза Жұманова өзінің әлеуметтік желідегі парақшасында жазды, деп хабарлайды Malim.kz.

Абай Бегей болашақ күйеу баласын сынақтан өткізбек болып, қызды бірден алып кеткені белгілі болды.

"Неше күннен бері сіздерге айтуға енді уақыты келген сияқты… Отбасымызда тіптен ойламаған жағдай орын алып, барлығымыз абдырап қалдық. Ақтауға отбасымызбен демалып келеміз деп, ұшуға бір ақ күн қалғанда, "үйдің ортаншы қызы Сымбатты алып қашып кетті" деген хабар жетті… Барлығымыз Алматыдамыз, Ақтаудан нағашы апаларын жіберіп, қызды бірден алып кеттік. Не үшін? Бұл жерде ешқандай менсінбеушілік немесе қарсылық танытқанымыз емес, Әкесінің талабын орындау болды", - деп мәлімдеді қыздың анасы. 

Абай Бегей жігіттің ата-анасын және өзін көрмей ешқандай қызын бермейтінін айтқан еді.

"Сол күні бірден Ақтаудан Алматыға жігіттің Ата-Анасы, ауыл үлкені келіп Әкемнің алдынан өтіп, уәделерін беріп, рұқсатын сұрады. Әкем де өз ауылымыздың үлкендерімен, жан-жағымен ақылдаса келе, екі күн ойлана келе, "Келген ел - көргенді, жөні түзу, сөздері дұрыс адамдар екен" - деп, "қызымның таңдауын құрметтеймін! Алла маңдайына жазып тұрса, бағы болсын!" - деп ақ батасын берді", - деп жазды Фариза Жұманова. 

Осылайша әнші ақ батасын беріп, Табынай ауылы Бегей ауылымен құда болған.

Фото: instagram.com/symbatabaikyzy