Нұр-Сұлтан қаласының қылмыстық істер жөніндегі сот алқасы «LRT ісі» бойынша түскен апелляциялық шағымдарды қарап, 28 мамырда шығарылған үкімнің күшін жойды. Іс прокуратураға «басты сот талқылауына кедергі келтіретін елеулі бұзушылықтары мен нормаларын жою үшін» қайтарылды. Прокурорлар істі біржақты емес, жан-жақты қарау керек. Бұл уақытта сотталушылар қамауда қала бермек.
Естеріңізге салсақ, қылмыстық іс бойынша жеті адам сотталып, 7 жылдан 10 жылға дейінгі мерзімге бас бостандығынан айырылған. Олар:
- Елорданың Жолаушылар көлігі және автомобиль жолдары басқармасының бұрынғы басшысы Рашид Аманжолов;
- Елорда мәслихатының экс-депутаты және хатшысы Жанат Нұрпейісов;
- «Astana Innovations» АҚ бұрынғы басқарма төрағасы Талғат Әшім;
Мердігерлердің өкілдері Ұлықбек Ачилов, Дәурен Әбдіхамитов, Дулат Мусенов және Тимур Қасабаев.
Сотталушылар «LRT жобасындағы жемқорлыққа» қатысы барын мойындамады.
Сыбайлас жемқорлықпен күрес іс-қимыл агенттігі ақша жымқыру схемасын елорда әкімінің бұрынғы орынбасары Қанат Сұлтанбеков және «Астана LRT» компаниясының экс-басшысы Талғат Ардан ұйымдастырған деп мәлімдеген. Алайда, олар әлі бостандықта. Агенттік таратқан ақпаратқа сенсек, екеуіне де халықаралық іздеу жарияланған. Қызығы, «Интерпол» сайтында Қазақстан іздеу салған азаматтардың арасында Сұлтанбеков те, Ардан да жоқ.
Байланысты жаналықтар
MalimBlocks
