MediaLab – әлемдік журналистикадағы үздік кітаптарды аударады

Журналистика – тек сөз бен бейнеден тұрмайды, оның ең басты сүйеніші дерек пен дәйек. Және ең бастысы еркіндік. Сөз бостандығы мәселесі біздің қоғамда жиі талқыланады, сөз бостандығы болмаған жерде демократия да болмайды. Ал, демократия жоқ жерде ештеңе болмайды. Дегенмен, сөз бостандығын кім қалай түсінеді деген мәселе бар. Сөз бостандығы – әр түрлі түсініктер емес, нақты заң болуға тиіс. Сөз бостандығын шектейтіндер де, шектен шығатындар да сол заңға бағынуға тиіс. Мәселен, ара-тұра журналист, блогерлердің жеке басты қорлауға қатысты түрлі дауға қалып, тіпті сотты болып жататынын да көріп жүрміз. Журналистке, яғни, кез келген медиамаманға осы орайда өз біліктілігін жетілдіріп отырмақ парыз. Нені жазу керек, қалай жазу керек дегеннен бастап, бүгінгі журналистика саласындағы жаңа бағыттар, тосын әдістер қандай, біз қай деңгейде тұрмыз, өзге ел қайда кетті, ақпаратты табу және өте ыңғайлы формада жеткізу, т.б. мәселелер қай кезде де күн тәртібінен түспеуге тиіс.

Қазақстан Республикасы Ақпарат және қоғамдық даму министрлігі бұл мәселе бойынша орталық ашатынын бұған дейін хабарлаған. Яғни, медиа мамандарды оқыту, біліктілігін арттыру, тәжірибесін ұштау мәселесінде заманауи технологиялар мен дәстүрлі озық әдістерді сараптап, сұрыптап отырып, журналистика саласында еңбек етіп жүргендерден бастап, аталмыш салаға енді аяқ басып жатқан жастарға дейін оқыту, үйрету үшін жұмыс істейтін орталық. Бүгін сол орталықтың ашылу салтанаты өтті. MediaLab деп аталатын журналистика орталығының ашылуына ҚР АҚпарат және Қоғамдық даму министрі Дархан Қыдырәлі мен ҚР Жоғары білім және ғылым министрі Саясат Нұрбекпен қатысты.

Ақпарат және қоғамдық даму министрлігіне қарасты Қазақстандық қоғамдық даму институтының жанынан ашылған орталықта медиа мамандардың біліктілігін арттыруға қажетті барлық жағдай жасалғаны жайлы айтқан Дархан Қыдырәлі:

"Естеріңізде болса, Astana MediaWeek форумда біз медиа индустрияны зерттеумен, журналистика және коммуникация саласындағы мамандардың біліктілігін арттырумен жүйелі түрде айналысатын орталық ашамыз деген едік. Енді, міне соның орайы бүгін келіп отыр.
"MediaLab" орталығы медиа тұтыну паттерндерін ғылыми тұрғыда зерттеуді, журналистердің, әсіресе аймақтағы журналистердің біліктілігін арттыруды, салалық журналистиканы жетілдіруді, баспасөз хатшыларының кәсіби дағдыларын дамытуды көздейді", - деді сөйлеген сөзінде.

оБұл орталықтың тағы бір артықшылығы, негізгі артықшылығы деуге де болады - Орталықта журналистика мамандығы бойынша оқып жатқан студенттерге де әдістемелік қолдау көрсетілмек. Бұл өз кезегінде студенттер мен журналистикада аты қалыптасқан, қаламы төселген, тәжірибесі мол мамандар мен кейінгі буыннын арасындағы байланысты нығайтады және дәстүр сабақтастығын арттырады. Министрдің айтуынша алдағы уақытта бұл орталық тек оқытумен, үйретумен ғана емес, түрлі кітаптарды аудару және жазумен де айналысады. «Ашық силлабус» деп аталатын жоба аясында журналистика мектептерінің озық саналатын бағдарламалары мен журналистика туралы үздік кітаптар мен оқулықтар аударылмақ. Демек, бұл журналистика саласын дамыту ғана емес, журналист мамандығын заманауиландыру, зерттеу журналистикасы сияқты біздің елде әлі де жолға толық қойыла алмай жатқан салаларға қолдау көрсету, жалпы журналистерге кәсібилігін арттыруға жағдай жасау деген сөз. Студенттер туралы сөз болған соң, екі министрлік біріге отырып әлі біраз шаруаны іске асыруға тиіс. Журналистика мамандығы бұрыннан оқытылып келеді, дегенмен, бұл мамандықты дамыта түсуге Ақпарат және қоғамдық даму министрлігінің де ат салыса бастауы құптарлық шаруа.