Мектепке дейінгі білім беру: 21 мың педагог біліктілігін арттырады
ҚР Оқу ағарту министрлігі балаларды мектепке дейінгі тәрбие мен оқытуды дамыту моделін әзірледі.
![](/images/article-img/1600/19287-1681210668-m.jpg)
Ол балалардың жан-жақты, тұтас дамуына бағытталған. Бұл туралы Орталық коммуникациялар қызметінің алаңында ҚР Оқу-ағарту министрлігі Мектепке дейінгі білім департаментінің директоры Наталья Жұмаділдаева мәлімдеді.
Модель әр баланың жеке ерекшеліктері негізінде мектеп жасына дейінгі балаларда қалыптасуы қажет дағдыларды анықтайды. Ата-аналар қоғамын балаларды тәрбиелеу мен оқыту процесіне жан-жақты тартуға көңіл бөлінеді. Жаңа модель, нормативтік құжаттарды жетілдіру, педагогтердің даярлығы мен біліктілік сапасын арттыру, қолжетімді пәндік-дамытушылық ортаны құру, қолжетімділікті қамтамасыз ету кезеңімен жүзеге асырылады.
Жыл сайын мектепке дейінгі тәрбие мен оқыту жүйесіндегі өзгерістер аясында біліктілікті арттыру курстарынан өтетін педагогтер саны артып келеді. Н.Жұмаділдаеваның айтуынша, мектепке дейінгі білім беру ұйымының 21 мың педагогы біліктілікті арттыру курстарынан өтеді. 2022 жылы 14 мыңнан астам педагог курстардан өткен, ал, 2023 жылы олардың саны 21 мыңға жетті. Осы орайда мектепке дейінгі ұйым тәрбиешілерінің мәртебесін арттыру мақсатында жалақы ұлғайту және тәрбиеші мен бала арасындағы жүктемені халықаралық көрсеткіштерге дейін төмендету тетіктері қарастырылуда. Сондай-ақ, бүгінгі таңда 2 жастан 6 жасқа дейінгі балаларды қамту 90%-ға жуық, 3 жастан 6 жасқа дейін – 98,3% болды, және соңғы төрт жыл ішінде балабақшаға кезекке тұру 4 есеге азайған. Бүгінгі таңда республика бойынша 0-ден 6 жасқа дейінгі 250 мыңнан аса бала балабақша кезегінде тұр. Мектепке дейінгі ұйымдарда орын тапшылығы мәселесін шешу үшін алдағы 3 жылда 223 мыңға жуық жаңа орын жасақтау жоспарда бар.
Халықтың әлеуметтік осал топтарынан шыққан балаларды тегін тамақпен қамтамасыз етуге ерекше назар аударылады. Мектепке дейінгі ерекше білім беруді қажет ететін 47 мың балаға диагноз қойылды. Соның ішінде 14 460 бала арнайы ұйымдар мен топтарға, 5 530 бала жалпы білім беру топтарына барады. Мүгедектігі бар бала тәрбиелеп отырған отбасылардан шыққан балалар үшін балабақша кезегіне жеңілдік қарастырылған.
ҚР Оқу-ағарту министрлігі Мектепке дейінгі білім департаментінің директоры айтқан тағы бір мәселе – мектепке дейінгі білім беру ұйымдарында қазақ тілін үйрету талаптары енгізіліп жатыр. 2022 жылдан бастап барлық жастағы бүлдіршіндерге қазақ тілін үйрену талаптары енгізілді.
Жалпы, қазақ тілінің мәртебесін көтеру мәселесі соңғы жылдары жиі көтеріліп жүр. «Тәрдие – тал бесіктен» деген қағиданы ескерсек, балабақшаға барған балалардың қазақ тілін үйренуі – оның бүкіл өміріне жететін азық болуға тиіс. Бұған дейін, тіпті, қоғамда бастауыш мектепте үш тілде білім беруге қатысты ведомство шешімі көп талқыланып, кері әсер туғызғаны белгілі. Осындай жағдайда тіл мәселесі мұндай шешімдер арқылы жөнге келуге тиіс. Орыс тілді отбасыларда өсіп келе жатқан балалар балабақшадан бастап қазақша сөйлесе, қазақша үйренсе – бұл мәселені шешудің ең негізгі бір жолы ретінде қарастыруға болады.
Айта кету керек, елімізде мектепке дейінгі ұйымдардың 70%-ға жуығы қазақ тілінде білім береді. Соңғы талап бойынша, қазақ тілін меңгеру мақсатында педагог күні бойы үлгілік бағдарламада айқындалған сөздік минимумын қолдануға мүмкіндік алады. Бұл тәрбиеленушілердің ауызша үйлесімді сөйлеуін дамытады, сөздік қорын байытады, қазақ тілін, қарым-қатынас мәдениетін меңгеруге ықпал етеді, сондай-ақ қазақ халқының мәдениетін салт-дәстүрлерімен кеңінен танысатын болады. Қазіргі таңда смартфон мен планшеттерге тәуелділік, оның ішіндегі ойындар мен программалар да шет тілдерінде кеңінен насихатталып жатыр. Енді ғана тілі шығып, қоғамды телефонмен танып жатқан ұрпаққа қазақ тілін,өз ана тілін балабақшадан санасына сіңіргені ұлттық тілге, ұрпаққа жасалған игі іс іспеттес.
Байланысты жаналықтар
MalimBlocks
![](/images/article-img/600/23673-1722415723.jpg)