Өзбекстанда шөлді аймақтардың шекарасы кеңейіп, минутына 9 шаршы метр жер шөлге айналуда.
Өзбекстан ғылым академиясының сейсмология институтының директоры Вахоб Рафиковтың сөзінше, шөлге айналу процессі жыл өткен сайын қарқынын үдетуде.
«Мирзачул, Карначул, Шерабад, Дальварзин және Қарақалпақ шөлдерінің шекарасы ұлғайып келеді. Бұл процесс жыл өткен сайын қарқынын арттырып жатыр. Бұл қатарға соңғы жылдары ең жас шөл – Арал теңізі қосылды», - дейді Рафиков.
Қазір Арал теңізінің табанынан көтеріліп жатқан құм мен тұз 300-400 шақырым аумаққа жайылып жатыр. Экологтардың есебі бойынша, әрбір минут сайын 9 шаршы метр жер шөлге айналуда.
Вахоб Рафиков «егер экологиялық және геоэкологиялық мәселелердің шешу жолдарын қазірден бастап қарастырмаса, онда 2030-2040 жылдары егін егетін жерлерден Ташкент пен оның маңайы ғана қалады», - дейді.
Шөл мәселесі Қазақстанда да үлкен проблема. Арал теңізін айтпағанда Маңғыстау, Атырау және Батыс Қазақстан облыстарында да Өзбекстандағыдай мәселелер бар. Осыдан біраз уақыт бұрын қазақстандық ғалым, биология ғылымдарының докторы Келіс Жайлыбай тиісті шаралар қолданбаса 40-50 жылдан кейін Қазақстан аумағы шөлге айналатынын, ал басым бөлігін қуаңшылық басатынын айтқан. Биылдың өзінде қыста қар мен көктемде жауын-шашынның болмауы салдарынан Маңғыстау мен Қызылорда облыстарында қуаңшылық болып, салдарынан ірі қара мал аштан қырылған.
Байланысты жаналықтар
MalimBlocks
