«Ұлттық қор – балаларға»: Қаражатты қалай алуға болады?
Жыл сайын жеткіншектердің шотына қаражат аударылады
2024 жылдың 1 қаңтарынан бастап «Ұлттық қор – балаларға» жобасы іске қосылады. Жоба аясында жыл сайын қаңтарда жеткіншектердің шотына қаражат аударылады. Бұл туралы Қаржы вице-министрі Дәурен Темірбеков айтты.
Атап айтсақ, Ұлттық қордың инвестициялық кірісінің 50 пайызы 18 жасқа дейінгі барлық жастағы балалар арасында бөлінеді.
«Алдын ала бағалау бойынша мұндай тәсіл осы бағдарлама аясында туғаннан бастап қамтылатын балаға жыл сайын 150-160 АҚШ доллар көлемінде 18 төлем алуға мүмкіндік береді. Әлеуметтік жобаларды іске асыру бойынша көп жылдық тәжірибені ескере отырып, жоба операторы ретінде «Бірыңғай жинақтаушы зейнетақы қоры» акционерлік қоғамы айқындалады», - деді вице-министр.
Бұл тұрғыда бала жинақтарының болжамды сомасы шамамен 3 500 АҚШ доллары болуы мүмкін. 18 жасқа толғанға дейін ақша Ұлттық қорда қалады және инвестицияланады.
«Бала өмірге келген кезде шоттар Әділет министрлігінің жеке тұлғалар дерекқорының ақпараты негізінде автоматты түрде ашылады. Жыл сайын 1 қаңтарда бала 18 жасқа толғанға дейін шоттарға қаражатты шартты түрде есептеу жүргізіледі», - деді Д. Темірбеков.
Шотта жинақталған қаражатты 18 жасқа толған азаматтар ғана пайдалана алады.
