Әскери қызметшілерге жаңа төлемдер енгізілді
Ішкі істер министрлігі әскери қызметшілерге арналған ақшалай қамтамасыз ету мен жәрдемақы төлеу тәртібіне түзетулер енгізді. Жаңа өзгерістерге сәйкес, «даладағы төлемдер» деп аталатын қосымша категория пайда болды. Ол тәулігіне 4 718 теңге мөлшерінде белгіленген, деп хабарлайды Malim.kz.
Министрдің бұйрығымен ережеге жаңа 8-1-параграф қосылды. Онда әскери қызметтің ерекшелігіне байланысты қосымша төлемдер қарастырылған.
Алайда бұл төлем мерзімді әскери қызметшілерге, әскери оқу орындарының курсанттары мен кадеттеріне, сондай-ақ жиынға шақырылған әскери міндеттілер мен резервтегілерге қолданылмайды. Қалған әскери қызметшілер дала жағдайындағы шығуларда, теңізге шығуда, оқу-жаттығулар мен жорықтарға қатысқанда тәулігіне 1,2 АЕК (2025 жылы – 4 718 теңге) көлемінде алады. Бұл жағдайда іссапар шығындары бөлек өтелмейді.
Төлемдер әскери бөлім командирінің бұйрығы негізінде есептеліп, дала жұмыстары аяқталғаннан кейін жеті жұмыс күні ішінде берілуі тиіс. Құжат 2025 жылғы 4 қазанда, ресми жарияланған күннен кейін он күн өткен соң күшіне енеді.
Фото: istockphoto.com
