Қазақстан президенті Қасым-Жомарт Тоқаев ағамыз "Мұқағали поэзиясы— күллі қазақтың болмыс-бітімі" деді. Болмыс- ішкі мән болса, қазақтың дүниетанымы, рухы, мінезі, қарапайымдылығы, өршіл асқақтығы — Мұқағали поэзиясының нақ болмысы.
Жатықтығы, көңілге қона кетуі, бунақтардағы түзу қаланған кірпіштей жайдақтығы, көркемдігі, сөзді ойнатуы және сөзді сұлу құрауы бұл — бітімі.
Мұқағали — поэзияға үлкен құрмет көрсеткен ақын. Күпі киген қазақтың қара өлеңінің үстіне шекпен жапты. Поэзияның ұлтқа, оқырманға жағымды, астарлы, сыршыл стилін жасады. Ол болашақ ұрпақтың тілі көркем әрі әсем шығуына тікелей ат салысты. Қазақтың адал да, аңғал, қайсар да, намысшыл болмысының суретін айнытпай салған суреткер болды. Сондықтан оның жырларынан кез-келген адам өзін, өз мұңын, өз қуанышын тауып алып жатады. Оның өлеңдерінде бәріміз бармыз, жақсымыз да, жаманымызда Мұқағали поэзиясының ішіндеміз.
Мұқағали — соғысқа дейінгі, соғыстан кейінгі үміт пен күдіктің, қайғы мен бір сәттік қуаныштың қаліндегі адамдардың образын жасады. Өмір мен өлімнің арасында аласұрған жанның, азап пен шаттықтың ортасындағы тіршіліктің, пенде мен періштелік пиғылдың бейнесін қағазға түсірді.
Ол — өлеңді сүйді, өлеңді өмір деп қабылдады!
9-шы ақпанды "Қазақ поэзиясының күні" деп атауды ұсынар едім. Ақынның өзі " Поэзия менімен егіз бе едің," деп кеткен жоқ па... Егіздер бір күнде туатыны айдан анық қой.
Біз 21 ші ғасыр ұрпақтары — Мұқағал поэзиясының құрдастарымыз! Оның өлеңдері өз сұлулығын сақтап, келесі ғасырлар ұрпақтарымен де аман-есен жүздесетініне кәміл сенем!
Қазақ әдебиеті өркендей берсін!
Айбек Ережеп
