Чемпиондар лигасы: «Қайрат» «Пальма»-дан жеңіліп қалды

Испанияның «Пальма» командасы футзалдан Чемпиондар лигасы финалында  қазақстандық «Қайраттан» басым түсті.  Осылайша ол чемпиондық атаққа қол жеткізді.

Ойынның 6-минутында олардың қатарынан Хесус Гордильо мергендік танытса, оған 8-минутта «Қайрат» сапынан Кайо Руис бір голмен жауап қайырды.

Одан кейін «Пальма» сапынан Лукас Машадо 18, Марио Равильос 19-минутта мергендік танытты.

Екінші кезеңде испаниялық командадан Фабиньо 23, 27, 28, 31, Нетиньо 32, Матеус Майя 37-минутта гол соқса, «Қайрат» құрамынан Дәурен Тұрсағұлов 33, Жахангир Рашит 35, Кевин Аррьета 39-минутта көздеген нысанадан мүлт кеткен жоқ.

Нәтижесінде алматылық клуб қарсыласына 4:9 есебімен жеңіліп қалды.

Осылайша «Пальма» аталған турнирде қатарынан үшінші мәрте чемпиондық тұғырға көтерілді. Олар бұдан бұрын 2022/23, 2023/24 жылдары жеңімпаз болған еді.

Ал «Қайрат» 2012/13, 2014/15 жылғы маусымда Чемпиондар лигасында бас жүлдеге ие болды.

Айта кетсек, 3-орын үшін ойында Португалияның «Спортинг» клубын 3:2 есебімен жеңген Испанияның «Картахена» командасы қола медаль алды.

Бас бапкер Марлон Веласко аталған турнирде «Қайрат» сапында төмендегі шәкірттеріне сенім артты. Қақпа Деннис пен Нарун Серіковке сеніп тапсырылған. Ал ойыншылар қатарында Арнольд Кнауб, Эдсон, Жахангир Рашит, Денер, Занотто, Дәурен Тұрсағұлов, Біржан Оразов, Кайо Руиз, Отанья, Кевин Арриета, Геге, Вендел да Силва Мендес, Алиссон бар.

Фото: ҚФФ