Рухани жаңғыру неден басталады? Әлбетте, өткенге зер сала отырып, болашаққа ұмтылу арқылы. Өшкеніңді жағып, жоғалтқаныңды тауып, ұлттық рухыңды бекітіп, құндылықтарыңды тани алмай тұрып, келешекке сенімді адымдаймын деу мүмкін емес. Соңғы жылдары ұзақ уақы бойы бодандықта болған елдің сол замандағы бостандыққа, Тәуелсіздікке ұмтылуы, бабалар аманаты, аңсары туралы жиі айтып жүрміз. Өткенді ұмытпау деген де осы болса керек.
Осы мақсатта Қазақстан Республикасы Мәдениет және спорт министрлігінің мұрындық болуымен «Ұлы дала мұрасы» атты пресс-тур өтті. Архив істері және құжаттаманы басқару комитетінің ұйымдастыруымен өткен іс-шара Қолжазбалар және сирек кітаптар ұлттық орталығына біраз мұраларды арнайы келушілерге көрсетті.
Әлбетте, аталмыш іс-шараның негізгі мақсаты – Қолжазбалар және сирек кітаптар ұлттық орталығы қорында сақталған мәдени мұраларды кеңінен насихаттау. Бұл жиынға Парламенті Сенатының депутаты Нұртөре Жүсіп, Парламенті Мәжілісінің депутаты Жанарбек Әшімжан, Президент баспасөзі қызметінің сарапшысы Ербол Алшынбай, тележурналист Зейін Әліпбек бастаған бірнеше қонақтар қатысты. Қонақтар көрмені таныстырушыларға сұрақтар қойып, арнайы сөз сөйлеп, әсерлері ерекше екенін айтып жатты.
Іс-шара барысында көрмеге қойылған көне қолжазбалар мен ескі кітаптар таныстырылып, аса құнды мұраларға реставрацияның қалай жасалатыны түсіндірілді. Мұндай көне мұраларды қайта қалпына келтіру үлкен ыждахаттылық пен ұқыптылықты қажет етеді. Өйткені, бұл түпнұсқа, бұл ескі уақыттың лебі есіп тұрған баға жеткісіз байлық. Орталықта 1920 жылы басылып шығарылған газеттер де ұсынылды. Одан кейін дөңгелек үстел ұйымдастырылып, көне кітаптарды жұртқа кеңінен насихаттаудың жолы туралы пікір алысты. Жалпы, жиын барысында көне мұраларды насихаттау «Рухани жаңғыру» бағдарламасы арқылы кеңінен жүріп жатқаны айтылды.
Байланысты жаналықтар
MalimBlocks
