Шығыс Қазақстан облысында заңсыз алтын өндірумен айналысқан ұйымдасқан топтың қызметі тоқтатылды. Қаржылық мониторинг агенттігінің мәліметінше, арнайы операция Ұлттық қауіпсіздік комитеті және прокуратурамен бірлесіп жүргізілген. Заңсыз жұмыстар Марқакөл ауданындағы Ақбұлақ ауылының маңында ешқандай рұқсат құжаттарынсыз жүргізілген.
Тергеу барысында заңсыз өндіріске 30-дан астам адамның қатысқаны анықталды. Олардың арасында Қытай азаматтары да болған. Күдіктілер құрамында алтыны бар кенді өндіру және өңдеу үшін ауыр арнайы техниканы пайдаланған. Тінту кезінде алты жүк көлігі, төрт экскаватор, тиегіш техникасы және алтынды жууға арналған екі өндірістік кешен тәркіленді.
Мамандардың айтуынша, заңсыз кен өндіру салдарынан қоршаған ортаға айтарлықтай зиян келген. Топырақтың құнарлы қабаты бүлініп, жер бедері өзгерген, тіпті өзен арнасына да залал келген. Қазір іс бойынша сотқа дейінгі тергеу жалғасып жатыр. Құқық қорғау органдары қылмысқа қатысы болуы мүмкін өзге тұлғаларды анықтап жатыр.
